416/2022-2023

Aizawl, 6^th May, 2022 : Ni 3 awh tur Ministry of Health & Family Welfare, New Delhi leh Gujarat sorkar țangkawpin an buatsaih “14th Conference of Central Council of Health and Family Welfare (CCHFW),” “Swasthya Chintan Shivir” ti a sawi bawk, Tent City, Kevadia, Gujarat-a neih mekah Health Minister Dr R. Lalthangliana a tel.

Central Council of Health and Family Welfare (CCHFW) hi India Constitution Article 263 tlawhchhana din niin, India ram chhunga Hriselna (Health) kawnga sawrkar hmalakna chungchanga inrawnkhawmna sang ber niin, May ni 5 – 7, 2022 inkar hian neih a ni.

He inrawnkhawmna sang, Ministry of Health & Family Welfare a mi pawimawh te bakah state tina Health Minister te, Health Secretary te, leh Mission Director, National Health Mission te telna hi nimin (May ni 5, 2022) khan Kevadia, Gujarat ah țan a ni a. Țanna inkhawmah hian Union Health Minister Dr Mansukh Mandaviya, Union Minister of State, Health & FW Dr Bharati Pravin Pawar, Gujarat Chief Minister Bhupendrabhai Patel te pawh an tel a ni.

He meeting ah hian Health lampanga policy khawih pawimawh tak tak rel tura chhawp a ni a. An thupui pawh "Towards a Future-ready Healthcare Ecosystem" tih niin state tina Health Minister leh officials te an tel țha hle a ni. 

Dr R. Lalthangliana hi a ni hnihna, vawiina session pawimawh tak  'Central - State Cooperation & Coordination: Healthy States Healthy Nation' tih thupui hmanga sawihonaah Co-Chairman atan ruat a ni a. Naktuk May ni 7, 2022 hian thusawi tura ruat a ni bawk. 

Vawiin session-a kaihhruainaah hian Dr R. Lalthangliana chuan damlo te inenkawlna senso a tlem zawk theih dan tur leh mitin thleng phak “Universal Health Coverage” a pawimawh thu sawiin zau taka sawihona neih a ni a. Sawrkar laipuiin Health Project leh Programme hrang hrang a neihah te sum hman tur (fund) a hun taka a release thin loh avanga hna kal muang leh thawktute harsatna tawhte sawi langin, sawrkar laipui leh state sawrkar hrang hrangte kan tanho a ngai a ni, a ti a. Sawrkar laipuiin hmalak dan tur dap se a duh thu a sawi a, a bik takin thawktute hlawh a hun taka pek theih a ni lo thin chu pawi a tih thu sawiin hlawh an lak tlai tawh loh nan kawng kan zawn tlan a ngai a ni, a ti.

Mizoram ațangin Health Minister Dr R. Lalthangliana bakah hian Health Secretary Pu R. Lalramnghaka leh Dr Eric Zomawia, Mission Director, National Health Mission te an tel a ni.

Kevadia, Gujarat hi khawvela milim (statue) sang ber, Sardar Vallabhbhai Patel a lim, Statue of Unity awmna hmun a ni.