Vawiin chawhnu dar 1:00 khan District Bawrhsap hovin a office ah kum 2017 krismas leh 2018 kumthar vuakveta halpuah, halmawi leh silai lem mu kap chhuak thei khuahkhirh dan tur chungchangah meeting neih a ni.

Bawrhsap chuan tanrual hi chakna a ni a, kan tan rual loh chuan eng thil mah kan ti thei lova, mipuiin min thawhpui loh chuan kan hlawhtling thei lo ani a ti a. Halpuah, Halmawi leh silai lem khapna chungchangah pawh mipui nena inngheng hnai ber Village Council leh YMA te nena kan thawh ho hi a pawimawh ani a ti.

Kumin hunpui vuakvet chhunga halpuah, halmawi leh silai lem, mu kap chhuak thei chi khapna thupek District Magistrate in a lo chhuah tawh chu theihtawpa bawhzui nise tiin an rel a. Kohhran hrang hrang, YMA leh Village Council tin te chu an huam chhungah theuh khapna thupek hi a tam thei ang ber lo puang zar tura ngen nise ti a rel niin, hunpui chhung hian halpuah hal miah lohna branch YMA te hnenah lawmman pek tura rel a ni bawk ani.

Sumdawngtute pawhin he thupek hi zawmin phal loh thil- halpuah, halmawi leh silai lem te zuar lui turin an ngen a, YMA leh Police tangkawpin uluk takin an vil reng dawn bawk ani. Tin, lirthei chak lutuka khalh leh lirthei ri bengchheng lutukte pawh siam lo tura mipuite ngenin, Police ten a tul angin hma an la chhunzawm zel dawn a ni.

He hunah hian Pu Chuauhnuna, MCS, Addl. Deputy Commissioner, Pu Lalmuanpuia, MPS, Addl. Superintendent of Police, Pu R. Vanrengpuia, MCS, SDO(Sadar) te bakah Village Council hrang hrang aiawh leh Sub-headquarters YMA aiawhte an tel a ni.