December Ni 4, 2018 khan Aizawl SP Conference Hall-ah Aizawl District Police hotute leh CYMA, MKHC (Mizoram Kohhran Hruaitu Committee) leh MIMA (Mizoram Merchant Association) hruaitute chuan krismas leh kumthar vuakveta halpuah, halmawi, silai lem a mu kap chhuah theih khap chungchangah thutkhawmna an nei a. Meeting hi Addl.SP (A) Pu P.C. Lalduhthanga chuan a kaihruai a, kum 2017-2018 krismas leh kumthar vuakvetah khan halpuah leh silai lem a mu kap chhuak thei chungchangah case 20 a awm thu a tarlang a. Kuminah pawh hian halpuah, halmawi leh silai lem hralh leh hman chungchangah AIzawl District Magistrate Dr. A. Muthamma chuan khapna thupek November Ni 15, 2018 khan a tichhuak tawh a. He thuchhuak hi ngaihtuah ho a nih hnuin a hnuaia tarlan ang hian hmalak tum a ni:

1. Aizawl District-ah chuan Police leh CYMA in halpuah leh halmawi chi reng reng leh silai lem a mu kapchhuak thei chi khapna bawhzui tura ruat sub-committee leh squad ten dan lova halpuah hralh/lei leh silai lem dapin hma an la zel dawn a. CYMA chuan vengtinah ngenna an lo siam tawh a, hemi bakah hian kohhran hruaitute hnenah ngenna siamin kohhran inkhawm pawimawhah vawi hnih (2) tal puan ni se tiin an rel a. MIMA hruaituten sumdawng leh dawrkai hnenah ngenna leh hriattirna lo siam nawn turin an rel a. He hunpuiah hian NGO leh police ten joint duty leh endikna zing thei ang bera neih mek hi neih chhunzawm zel a ni ang. Dan bawhchhiate chu IPC Sec. 188 anga hrem turin police-in hma an la zel bawk ang. Duty neih dan tur hi Police OC leh YMA leader ten a tul dan angin remruatna an lo siam thin ang a, khapna thupek bawhchhiate chunga hremna chungchangah Aizawl District chhunga Judicial Magistrate leh Executive Magistrate te chuan Police/NGO duty-te pui thin turin Committee chuan a beisei bawk a ni.

2. CYMA hmalak mekah Aizawl khawpui hmun thlan bik Bawngkawn Bazar, Bara Bazar, Vaivakawn Bazar, Mission Veng Bazar leh hmun pawimawh bikah Police leh YMA duty siam a ni a, a bialtu SDPO/Police Station OC-te atangin Police Officer leh staff te ruat thin an ni ang a. YMA member-te nen duty/checking neih thin a ni ang. Hetiang bawk hian Aizawl District chhunga khaw hrang hrangah pawh Police leh YMA/NGO ten thawhhona tha tak neiin hma lak tum a ni a. Duty/checking neihlai leh an manchhuahte chu midangte zirtirtu atan media-ah rang taka pholan thin tura rel a ni.

3. Police ten Aizawl City area chhung veng hrang hrangah halpuah/halmawi hal lo tura hriattirna leh ngenna poster/ banner tar tura hmalak Meeting chuan tha an ti tlang a. CYMA hmalaknain YMA branch hrang hrang ten khapna thupek leh ngenna YMA Information Centre atangin tam thei ang ber puan nawn leh ni se tiin an rel bawk.

4.Media hrang hrang kaltlangin halpuah/halmawi leh silai lem a mu kap chhuak thei chite zuar lo tur leh hal/hmang lo tura mipuite zirtirna leh ngenna uar taka puan ni se. Kum hmasa lama hetiang kaihhnawiha man lo tawk tawh te pawh a theih chin chinah ti tawh lo tura ngenna siam ni se. Police/NGO hrang hrang ten hmalakna ti chaktu atan Media mi leh sate (Print & Electronic/Local TV) pawh he khapna thupek leh Police/NGO-te hmalakna bakah mipuite zirtirna a tam thei ang bera puanzar sak zel turin Committee chuan a ngen tak meuh meuh a ni.

5. MIMA hruaitute pawhin an member-te hnenah he meeting thuchhuak leh DC khapna order te inhrilh thar turin an rel a. Danin a khap chah lut lo/zuar lo turin infuih thar leh ni se, lo la lut tawh an awm a nih pawhin zuar lo tura ngen leh hriattir ni se, an ti a ni.

6. Aizawl khawpui chhung veng hrang hrang Local Council leh Aizawl District chhung khaw hrang hrang Village Council te pawh CYMA ten an lo ngen tawh angin mipuiten thlamuang leh hlim taka krismas leh kumthar an hman theih nan a tam thei ang bera khapna thupek leh hmalakna te, mipuite zirtirna leh ngenna te mahni veng/khua theuhah puangzar turin Committee chuan a ngen nawn leh a ni.

7. Aizawl khawpui chhung leh Aizawl District chhunga NGO zawng zawng (MHIP/MUP/MZP/MSU etc) bakah VDP unit zawng zawng pawh he khapna thupek kenkawh chungchangah member tin ten nasa taka bial chhung theuhah hma la turin Committee chuan a ngen a ni.

8. December Ni 11, 2018 hi Mizoram Inthlanpui vote chhiar ni a ni a, he hunah hian political party zawng zawng pawhin an tlin lawm nan emaw chak loh lantirna emaw, tumahin halpuah leh a kaihhnawih hmang lo hram turin an ngen a ni.