2742/2024-2025

Dated Hnahthial, the 29th October, 2024: Vawiin khan Hnahthial DC Conference Hall-ah Sawrkar Flagship Programme - 'Handholding Policy' hnuaia Thlai thar chhuah hralh dan tur inhrilhhriatna - "District Sensitization Programme on Thlai Thar Marketing under Handholding Policy, 2024" chu he policy hnuaia line department aiawh kalkhawmte tan neih a ni a. Bawrhsap Pi Rita Lalnunmawii Pachuau chuan he hun hi kaihruaiin Dr. H. Saithantluanga, OSD to Minister ( A&FWD), member MAMB hnen atangin policy chungchang ngaihthlak a ni a. Pu Isak Lalremruata, Co-opted member, MAMB chuan Handholding Policy chungchangah presentation a nei bawk a ni.

Bawrhsap chuan he flagship programme, lo neitute tana sawrkarin a lo duan hi hlawk taka mipui ten an hman theuh theih a beisei thu sawiin chumi atan chuan he Handholding Policy ti hlawhtling tura sawrkarin department a ruat, line department aiawha rawn kalkhawm ho chu an pawimawh hle thu a sawi a. District Agriculture Marketing Committee chu lo neitute puih nana duan an ni tih hre reng turin kalkhawmte chu a duh thu a sawi a. Hnahthial District hi mi taima awm khawmna a nih thu sawiin chung kut hnathawktu taima tak tak ten hma an sawn theih nan leh man man zawka an thlai tharte an hralh theih nan kalkhawm zawng zawngte chu theihtawp chhuah turin a sawm a ni.

Dr. H. Saithantluanga chuan Handholding Policy kalpui dan tur tlangpui tarlangin he sawrkar hmalakna hmang hian Mizoram hian bung thar an kai ngei a beisei thu a sawi a. Sawrkar hian lo neitute a ngaih pawimawh thu sawiin chumi avang chuan he policy tih hlawhtlin nan a Agricultural Marketing Assurance Fund (AMAF) pawh a awm tawh thu a sawi a. Agriculture hi unorganised sector, lo neituten hralh dan tur mumal awm lova an thlai tharte an hralh thinna a nih thu sawiin he sawrkar policy hian unorganised sector chu organised sector, mumal leh man man zawk a lo neitu ten an thlai tharte an hralh theih nan a siam chu a tum ber anih thu a sawi a. Hei hian thlalai tam zawkte agriculture lamah an luh tam phah a beisei thu a sawi bawk a ni.

Pu Isak Lalremruata hnen atangin department aiawha kalkhawmte tan he policy hnuaia thlai thar hralh chhuah dan tur chungchanga pawimawh inhrilhhriatna presentation neih a ni a. Sawrkar chu lo neitute (farmers) leh a lo leitu tur (buyers) thlun zawmtu (facilitator) a nih thu sawiin chumi tihhlawhtlin nana sawrkarin thlai thar hralh chhuah a tum dan chi hrang hrang tarlan a ni a. Lo neitute chuan an khaw tina Society ho hnenah an thlai tharte dah khawmna hmun tur - Primary Collection Centre-ah chhung khawmin chumi zawh chuan District a dah khawmna hmunpui - Secondary Collection Centre-ah chhun luh leh tur a ni ang a. Secondary Collection Centre-ah chuan auction kalpui thin tur niin thlai tinte sawrkarin a man bituk, floor price a phak lohna chu Minimum Support Price hmangin a chhawmdawl thin ang. Primary collection centre a Auction kalpui anih thung erawh chuan MSP a awm ve lo thung ang.

Presentation neih zawh hnu hian department aiawh kalkhawmte nen zawhna leh chhanna hun neih a ni a. He Sensitization programme a thil inhrilhhriat leh sawi hona bawhzui hian karleh lamah DAMC thutkhawmna neih leh tura ruahmanna siam a ni.

He programme hi Pu Zothanmawia Khiangte, Addl DC chuan lawmthu sawina in a khar a ni.