Vawiin khan Lunglei W bialtu MLA leh Agriculture, I&WR leh Cooperation Department-te changtu Minister ni bawk Pu C. Lalrinsanga chuan a bial chhung Huaruang khuaa NABARD kaltlanga High School Building sak thar a hawng. 

Pu C.Lalrinsanga chuan Hauruang khua miten an mamawh em em high school building thar tha tak hawn a ni  chu lawmawm tiin he hmalakna ti hlawhtling tura tan la tu khawtlang hruaitute leh Huaruang khaw mipui te chungah lawmthu a sawi a. School building thar buatsaih chuan zirlaite nunah nghawng tha tak neia rah tha tak a chhuah ngei a beisei thu sawiin Hauruang mipuite chu neitu rilru pu chunga duat taka lo enkawl chhunzawm turin a chah a. Zirna leh eizawnna kawngah zirlaite chu hmathlir thui tak nei tur leh an talent mila eizawnna nei thei tura inpuahchah chho turin a chah a ni.

Hauruang High School hi kum 1992 ah din niin primary school building hlui ah bul tan a ni. Tun dinhmunah zirirtu paruk leh zirlai 38 an awm mek a ni. Hauruang High School hawn thar ah hian staff room, toilet pahnih, laboratory/library, kitchen, classroom pahnih leh headmasters office te ruahman a ni.

Minister hian nizan khan Elbruz Gym 1st Mizoram Open Amateur MMA Championship final Saizaikawn Multipurpose Hall-a neih a hmanpui bawk a ni.