No.3458/2021-2022 

 Aizawl, 18^th December, 2021 : Rural Development Department Minister Pu Lalruatkima’n tun thla tira sawrkar laipui dawra New Delhi a zin hmalakna kal zelah  Ministry of Rural Development, Govt. of India chuan nimin December ni 17, 2021 (Zirtawpni) khan Mizoram tan MGNREGS (Ni 100 inhlawhna) ah mipui nuai hnih (Job Card holders) te inhlawhna cheng nuai 14,173.114 (Rs.14,173.114 lakh) a rawn sanction a. Heng sanction atang hian ST Category tan cheng nuai 14,000 (Rs.14,000 lakh), SC Category tan cheng nuai 168.69 (Rs. 168.69 lakh) leh Other Category tan cheng nuai 4.424 (Rs. 4.424 lakh) hmuh a ni. He Fund sanctioned hian tun kuma MGNREGS hnuai mipuite inhlawh tawhna leh inhlawh mekna tam zawk a phuhru thei dawn a ni. Heng sum te hi a changtu tur mipuite kutah, Job Card Holder te account ah Direct Benefit Transfer in karleh chho ah hi chuan a lut nghal tura beisei a ni.  

Rural Development Department chuan hripui (pandemic) vanga harsatna tawh a nih mek lai leh Mizote hunpui Krismas lo in herchhuak turah chhungtinte, a bik takin thingtlang lam te tan sum induhthawhna a san lai taka Minister thahnemngaihna te, a hmalakna te leh a tul ang anga Sawrkar laipui lam hotute a dawrna zarah heti zat sum, thingtlang mipuite kut (an account) ngeia a lut tur hi lawmawm a ti takzet a ni. MGNREGS sum hi thingtlang mipuite tan thil tha (assets) tam tak siamna leh development hnathawhna a ni a, he Scheme hian thingtlang mipuite harsatna nasa takin a chhawk zangkhai sak leh ngei RD Department chuan a beisei bawk a ni.

 Rural Development Department chuan Central Sawrkar leh Mizoram sawrkar chungah lawmthu a sawi tak meuh meuh a, Mizo mipuite pawh Krismas leh Kumthar hlim leh lawm taka hmang theuh turin duhsakna a hlan bawk a ni.