No.34592021-2022 

Aizawl, 18th December, 2021 : Human Resources Development Board Vice-Chairman Pu L. Thangmawia, MLA chuan vawiin khan Pi Zaii Hall, Synod Conference Centre-ah Mizo Academy of Letters (MAL) Annual Meeting hmanpuiin Pathianin Mizo hnam a din chhoh mekna kawngah Mizo Tawng chu a pawimawh zia sawiin, kan hnam dinchhuahna kawnga a tichaktu a nih vangin a tihchangtlunna kawngah theihtawp chhuah a tul tih a sawi. 

MAL Annual Meetinga khuallian Pu L. Thangmawia chuan Chief Minister Pu Zoramthanga leh Human Resources Development Board Chairman, Pu Lalchhandama Ralte, School Education Minister ni bawk ten Mizo Tawng humhalh leh tihhmasawn an ngai pawimawh takzet tih sawiin, hemi atana hma la tur bik Mizo Language Board (MLB) din turin ruahmanna an siam hial a, Mizo Language Board din a nih hunah pawh Mizo ziakmite kutchhuak leh sulhnu an chhawr tangkai hle dawn tih sawiin, ziakmite chu a tul anga thurawn pe tur leh finchhuah thin turin a sawm a ni. 

Pu L. Thangmawia chuan MAL ten chawibelh pawh huama theihtawp chhuaha Mizo Tawng hmasawnna tura hma an lak thinnaah lawmthu sawiin, khawvel thiamna leh hmasawnna thang zelah hnamdang tawng leh literature ten min chiahpiah nasa tawh em em a, hemi karah hian thangthar ten Mizo tawng hman dan dik an theihnghilh loh nan leh Mizo kutchhuak thu leh hla te an hlut zel theihnan theihtawp kan chhuah tlan a tul a ni, a ti a. Mizo Tawng hi sawrkar Allocation of Business Rules a telh turin hma an lak mek thu a sawi a, kumin chhung ngei hian a hlawhtlinna kan hmuh hman ka beisei a ni, a  ti. 

Pu L. Thangmawia hian Mizo Academy of Letters “Book of the Year 2020” atana thlan “Eng Nge I zawn ? (Zofa Kristiante kan Tamchhawl” tih ziaktu Dr Rema Chhakchhuak hnenah chawimawina thuziak leh tangkafai a hlan a, Pu B. Lalthangliana lehkhabu ziah “Mizo Chanchin” leh Prof. Laltluangliana Khiangte lehkhabu ziah pahnih “ Zo Lungthu Pathumte” leh “Writing in Mizo Manuscript” chu a tlangzarh nghal bawk a. MAL ten hennah hian krismas thilpek atan tangkafai Rs. 10000/- a hlan zui bawk a ni. 

Mizo Academy of Letters “Book of the Year” hi kumtin MAL Foundation Day, April ni 23-ah hlan thin a ni a, hripui leng vangin kumin hian Annual Meetingah hlan a ni thung a ni. Book of the Year hian lawmman tangkafai Rs, 10,000/- leh chawimawina thuziak (citation) a keng thin a, lawmman tangka hi Pu PC Rodingliana, Durtlang leh Pu PL Liandinga, Khatla South ten an pa Pu Lalngura, kum 1991 a boral ta hriatreng nan an tum a ni. 

MAL hian vawiin chawhnu lamah hian Mizoram Journalist Association General Headquarters hruaitute kaihhruaina hnuaiah an pawl hruaitu tharte an thlang a ni.