1838/2023-2024

Dated Saitual the 11th September 2023: Vawiin khan Health and Family Welfare Department Minister Dr R Lalthangliana chuan Saitual Chief Medical Officer (CMO) Office Building chu khuallian niin a hawng.

He hawnna pual a inkhawm CMO office building thar a neih ah hian khuallian chuan Covid hrileng in hun rei tak mizoram a tuam avangin sum thahnem tak a luang ral a, chuti chung chuan covid zawh hnu reilo te ah district thar pathum a CMO office hawn theih a peihfel a ni chu a lawmawm hle a ni, a ti a. Minister chuan Health kaihhnawih a hmasawnna chi hrang hrang tarlang in India ramah naupang piang hlim thi, Infant mortality rate ah mizoram chu a tlem ber kan ni a, Health index ah pawh pakhatna kan la hauh deuh zel a ni, a ti. Hospital infrastructure pawh tih changtlun zel a ni tih sawiin, District Hospital tinah oxygen plant dah a ni tawh a ni, a ti a, Lunglei ah Oxygen Filling Station pawh tun hnaiah khan dah a nih thu a sawi bawk.

Dr R Lalthangliana chuan Health Department chu Department hnathawh dan danglam deuh bik a nih avangin sawrkar pawh in a ngai pawimawh takzet a ni, a ti a. Doctor pension hun pawh kum hnih a pawhsei a ni a, tun hnai ah Nursing Directorate pawh establish tur a notification tih chhuah a ni tawh a ni, a ti. Hetih rual hian nurse te ramdanga an thawh theihna tur pawh theih ang anga dap sak anni a, in dawr na a kal mek a ni, a ti.

Minister chuan Saitual District chu sawrkar in a ngaihsak hle a ni, a ti a. Ruallung chu Doctor leh Nurse awm na tur Urban Health and wellness center ah upgrade niin Saitual ah CMO office pawh building tha tak mai annei ta chu sawrkar in a ngaihsak zia tilang chiang tu a ni, a ti. Doctor indaihlohna chungchang sawiin, tunah hian Doctor sawrkar in a chhawr lai mi 30 chuang PG an zir mek a, service lai te an lo pension anih loh pawh in nunna chan te an lo awm thin a, ZMC a final year zo tawh ho lah internship an ti mek bawk si nen, Doctor District Hospital a post ruak hnawhkhat tur in tun dinhmun ah chuan a harsa rih hle a ni, a ti.

Minister chuan Doctor leh Nurse kalkhawmte chu an hna tlawmngai leh taima taka thawk turin a ngen a. Damlo te chu an tawngkam chhuak avang a rilru lam thleng a damna nei thei anni tih hria a, hmangaih leh duat taka enkawl turin a ngen a ni.

Dr Lalngura Tlau, Saitual Bawrhsap pawh in thu sawiin Saitual ah CMO office din a ni chu a lawmawm hle a ni, a ti a. Saitualah tun hnaiah sawrkar hmalakna in office hawn a ni chho zel a, amaherawhchu Office building hawn chu a lawmawm hle rual in a theih ang a thawktu te rawn dah tur a hma lak sak turin Minister chu a ngen nghal bawk a ni.

Pu Lalrinenga Sailo AMC Mayor pawh in he hun hi tel puiin Saitual mamawh te a thlen a.
Health Minister chu mizoram tan India mai nilo ram dang, world bank leh institutions dang te atanga mizoram hmasawnna tur a chawilut thei thin chu a ropui a tih thu a sawi.

Dr Eric zomawia, Mission Director NHM in Mizoram health system strengthening project chungchang sawiin CMO building pawh MHSSP hnuaia sak a nih thu a sawi a.

Hriselna lama mizoram a hmalakna hrang hrang te tarlang in sawrkar in theihtawp a Health department tha tak a kal chhoh zel theih nan a hna a thawk chu a lawmawm hle a ni, a ti.

Mizoram Health System Strengthening Project(MHSSP)-a Sr. Civil Engineer, Pu Lalramsanga chuan technical report pein MHSSP chuan Mizoram mipui ten hriselna kawnga hma an sawn theih nan ‘heath system’ leh ‘health infrastructure’ changtlung tak din a tum a ni, a ti a.

Saitual CMO Building hi cheng nuai 441 senga Lushai Engineers ten an sak a ni a; mizopa chhiara chhawng li-a sang a sak niin, square meter 1071.6sq.m a zau a ni a, Senior CMO, Sr Medical Officer, Drugs Inspector, National Health Mission, District Early Intervention Centre, Accounts Section, Conference Hall, Meeting room, Mobile Medical Unit, Establishment Section, District Blindness Control Programme, District TB Centre, Food and Drugs, NPCDCS, District Vector Borne Diseases Control Program, Expanded Program in Immunization te tan room pakhat theuh bakah Ground Floor-ah Temporary Storage Area pahnih leh a chhehvelah Open Car Parking a awm a, mipa leh hmeichhe inthiarna sawm ve ve a awm bawk a ni.

He hun hi Health & Family Welfare Department Principal Secretary Pi Esther Lalruatkimi chuan kaihruaiin inlawmna thu a sawi a. Hun khirh tak kara pawh Minister chak tak kan neih avangin Mizoram chu health ah kawng hrang hrang ah hma kan sawn a ni, a ti. Dr. Lalremmawii, Director of Health Services chuan lawmthu sawina hun a hman zawhah inkhawm hi tihtawp a ni.