1839/2023-2024

Dated Saitual the 11th September 2023 : Vawiin khan Saitual ah Health and Family Welfare Minister Dr R Lalthangliana chuan Saitual College Canteen /Cafeteria leh Library chu a hawng.

He hawnna puala inkhawm ah hian Khuallian, H&FW Minister Dr R Lalthangliana chuan zirlai kalkhawmte hnenah chuan a rualpawl chin ringawt ni lova thiamna tak tak nei tur in a chah a. National Education Policy avang in multidisciplinary learning hman chhoh a ni anga, chuvang chuan zirtirtu tur pawh discipline chi hrang hrang zirtir thei tu tur mamawh an ni anga, chu mamawhna lo la awm thei te phuhruk thei tur a kan zirna te pawh line hrang hrang a kan tih zau a pawimawh a ni, a ti. Minister chuan hetiang harsatna hi ZMC din a nih khan sawrkar chuan a tawk tawh a ni tih sawiin, department thenkhat a zirtirtu tur awm nual si, department thenkhat thung ah erawh indaihlohna a tam in a zawn a zawn hial an ngai zawk a ni, a ti.

Mizoram chu zirna lamah India ah kan san chhoh zel thu sawiin, literacy rate piahlam ah zirna sang zawk, higher education ah pawh hma kan sawn ve zel a ni, a ti. Mizoram a college te chu India ram state hrang hrang college ah NAAC accreditation 83% in kan nei a, UGC in a Higher education institutions a recognise 23 ah 19 chuan NAAC accreditation an nei a, chu chu ram chhunga sang ber a ni, a ti.

Dr R Lalthangliana chuan zirlai kalkhawmte chu an lehkha zir chhan hrechiang turin a chah a, mahni leh chhungkua mai nilo, ram tana chenfakawm ni thei turin duhsakna a hlan a ni.

Pi Sangchhin Chinzah, Director, Higher and Technical Department pawh in thu sawiin Zirlai kalkhawmte chu nakina ram hruaitu tur an la ni thei a ni, a ti a. Mizo zia tha tak, nu leh pa leh aia upa zah chu nunpui reng turin a fuih a .Pi Sangchhini chuan kalkhawmte chu tuna an awmdan in an nakin hun tur a hril tur thu thu sawiin, tum nei ran a rinawm leh taima taka nung leh zir turin a chah a ni.

Dr Zarzoliana, Addl SPD, RUSA in technical Report pe in library leh canteen chu Rusa Component 9, Infrastructure Grants to colleges hmanga sak a ni, a ti a. Library Building hi Cheng Nuaih 90 seng a sak niin Canteen hi Cheng nuaih 45 senga sak a ni. Library building hian floor hnih neiin 1196sq.ft a zau a ni a, facilities chi hrang hrang awmin hmeichhia leh mipa toilet hran a awm bawk. Canteen hi Floor 1 niin 1185 Sq ft a zau a ni a, mipa leh hmeichhe toilet a awm hrang bawk a ni.

Inkhawm hi Pi Esther Lalruatkimi, Principal Secretary, Higher and Technical Education in kaihruaiin Saitual a zirna in hma a sawn zel chu a lawmawm hle a ni, a ti a, naupang te chuan building thar te chu tangkai taka hmang turin duhsakna a hlan a ni. Saitual College Principal Pu Lalzarmawia chuan lawmthu sawina a neih hnu in inkhawm hi tihtawp a ni.