Nimin tlai khan Hotel Floria, Aizawl-ah Health & Family Welfare Department leh Japan International Cooperation Agency (JICA)India hotute an inkawm a,  Health & Family Welfare Department hi a changtu Minister Dr.R.Lalthangliana hovin Department Secretary, Principal Director leh Department hotu pawimawh tak tak an tel a, zanriah an kilho nghal bawk.

He inkawmhona hi JICA  kaltlanga Mizoram a Cancer Specialty Hospital dinna tura atan a hmalak mek naah bultanna pawimawh tak a ni a, he Cancer hospital din tur hi North East-ah pawh a tha ber tura ruahman a ni.

Minister Dr. R. Lalthangliana chuan Mizoram chu India rama state zingah cancer hluarna ber a ni chunga he natna enkawlna tur hospital tha kan neih siloh avangin phai lamah mi tam tak refer thin an nih thu a sawi a. Sawrkar laipuiin tuna kan cancer hospital neih sa tichangtlunga Tertiary Care Cancer Centre (TCCC) din phalsakna a pe chungin sum hman tur erawh reimbursement system a pek a tum avangin hmalak zelna turah harsatna an tawh thu a sawi a, hetiang dinhmun a kan din lai a JICA atanga puihna kan hmu thei tur chu a lawmawm a tih thu a sawi. He hunah hian Mizorama cancer dinhmun te, Cancer Specialty dinna tura hmalakna kal mek leh hma lak zel dan turte uluk taka sawiho a ni a.

He i kawmhonaah hian JICA  aiawhin  Mr. Katsuo Matsumoto, Chief Representative, JICA India, Ms. Mariya Watanabe, Representative, JICA India, Ms. Megumi Kitabatake, Project Formulation Advisor, JICA India, Ms. Aditi Puri, Lead Development Specialist, JICA India leh Mr. Subroto Talukdar, Additional Chief Development Specialist, JICA India te an tel a.Public Health Foundation of India (PHFI) atangin Dr.Priscilla C Ngaihte, i/c NE States & Co Head Project Swasth Uttar Purv a tel bawk a ni.