Vawiin khan National e-Governance Division, Ministry of Electronics & Information Technology leh Information & Communication Technology(ICT) tangkawp chuan Sectretariat Conference Hall, MINECO-ah India Enterprise Architecture(IndEA) zirchianna a buatsaih a. IndEA hi mipui tana Website pakhat hmanga sawrkar department zawng zawng an dawr theihna leh information an hriat duh zawng zawng an hriat theihna tura hmalakna a ni a. He hun hi Pu Robert Romawia Royte, Minister of State, ICT, Sports, etc. chuan khuallian niin a hmanpui a ni.
IndEA Workshop hawngtu Pu Robert Romawia Royte, Minister of State, ICT, Sports, etc. chuan Information & Communication Technology chu ram changkang zawk leh India rama Ministry leh State thenkhat ten tangkai takin hmasawn nan an hmang tawh tih a sawi a. Mizoram pawhin Computer theihna te tangkai taka hman a hun tawh a ti. Tun dinhmunah Sawrkar Department hrang hrang ten Website hrang theuh an nei mek a; heng website te hi thlun zawm a nih loh avang a hran theuh a luchhuah ngai vek a ni a. Data leh Information, bakah statistics dik zawk inpe tawn zung zung turin thiltih a harsa hle a. Planning leh project siam tura statistics pawimawh hmun khat atanga neih theih a ni lova, a buaithlak thin hle tih a sawi a. Bill pek, form download leh information pawimawh haichhuah theihna tura Website hrang hrang te inthlunzawmna Enterprise Architecture hmanga Website siam a nih chuan nasa takin sawrkar department te leh mipui tan thiltih a awlsam zawk dawn a. Hmasawnna kawngah pawh hlawk takin ke pen a theih dawn a ni tiin IndEA chu Mizoram tan pawh hman ve thuai a tul dawn a ni a ti.
IndEA in a tum ber chu mipui tan awlsam zawka sawkar a dawr theihna tura Enterprise Architecture hmanga Website te siam leh Digital India ti puitling tura hmalakna a ni a. IndEA hian ramchhung inrelbawlna felfai zawk leh langtlang zawk a thlen ngei beisei a ni a. Tun dinhmunah Ministry of Agriculture, Ministry of Education leh State 2 ten IndEA hi an hmang tawh a. India hmarchhak state zingah chuan Meghalaya State in tangkai takin an hmang mek a. Punjab, Maharashtra, Kerala, Delhi, Jharkhand leh Rajasthan te pawh IndEA hmang ve turin an inpuahchah mek bawk a ni.
IndEA workshop hi Pu Amjad Tak, Commissioner & Secretary, ICT Department chuan a kaihruai a. He hunah hian IndEA chungchang tlangpui Pu Ranjeev Pandey, Principal Consultant, NeGD hnen atangin ngaihthlak a ni a.Dr Pallab Saha, Senior Lead EA Expert, NeGD in IndEA - Framework and Adoption Guide & Road Map a sawifiah a. Best practice principles for designing and delivering government services - Digital Service Standard tih thupui hmangin Pu Bramhanand Jha, Senior Consultant -PM, NeGD chuan zirtirna a pe bawk a. NIC lam atangin IndEA hlawhtling taka kalpui tawhna te entirna hun an hmang leh a. Zawhna leh Chhanna hun hman a ni bawk a ni.
