Vawiin hian Directorate of Agriculture (CH) Mizoram buatsaihin Soil Health Card Scheme and Soil sample collection technique chungchang training DAO Office Training Hall, Serchhip ah neih a ni.

Training hi Pu Lalnithanga, DAO Serchhip in a kaihruai a, loneitute leh department thawktute pawhin a mamawh em em hriatna min pe tura Aizawl lama department hotuten Training an rawn buatsaih sak chu lawmawm a tih thu a sawi a, training chhim tura kal te chu an thil zir te hriatfiah ngei tum turin a ngen a ni.

Training hun hnihah then niin hun khatna ah hian Resource Person Pi Lalengzami Haolai, Dy. Director (SS) chuan Soil Health Card Scheme sawifiahna leh zirtirna a nei a, lei (soil) pawimawh zia te, ram ngaw zawng zawng aia leiin mihring tana hna a thawh nasat zawk dan te, loneituten kan hriat lohna avanga kan mamawh aia tam lei kan tih chereu thin dan te, ram ruak kan neih te hman tangkai thiam a tul dan te a sawi a. Sawrkar laipuiin buh leh bal hlawk zawk leh hrisel zawk kan thar theih nana scheme pawimawh tak pakhat, Soil Health Card Scheme a duan chhuah dan leh he scheme in a thil tum hrang hrang te zitirna a nei a. A thil tum langsar zualte chu - kum thum dana loneitute hnena Soil health card pek chhuah thin te, lei endikna khawl neih leh tihchangtlun te, lei endik a nih hnua sawngbawl dan tur te, dik leh tha zawka lei enkawl dan tur department a thawktute leh loneitute zirtir a ni, a ti.

Training hun hnihna ah hian Resource Person Pi Zodinpuii, Asst. Soil Chemist chuan lei sample lak khawm dan chungchang a zirtir bawk a ni.

Training ah hian District Agriculture Office Serchhip a Officer leh Technical hna thawktute, ATMA Serchhip leh FOCUS Serchhip a thawktute an tel a ni.