Tukin khan Health & Family Welfare Minister Pu Dr.R.Lalthangliana chuan Aizawl Civil Hospital-a thli paihna chungchangah Dawrpui Welfare Committee kawmin, a hmunah harsatna mipuite’n an tawhte en in, mumal taka hmalak a nih tur thu a sawi.  Minister chuan Department hrang hrangte tan hona (convergence) a pawimawh tak zet a ni, a ti a. Aizawl Civil Hospital thli paihna tur hi Health Department mai bakah Aizawl Municipal Corporation (AMC), UD&PA, PHE, State Pollution Control Board a mithiamte leh officers te pawhin an finchhuah a ngai a ni, tiin a sawi.

Health & Family Welfare Minister hi Sports & Youth Affairs Minister Pu Robert Romawia Royte chuan tawiawmin, drain mumal awm thei tura hmalak leh bawlhlawh paihna awmze neia siam chu a pawimawh thu a sawi.

Minister Pu. Dr.R.Lalthangliana chuan eizawnna atana chhungkaw tam takin an hman mek Commerce and Industries Department hmalakna New Market Building chu a hmunah tlawhin, New Market Office-ah Department hotute nen inkawmna hun an hmang a ni. He hunah hian Sports & Youth Affairs Minister Pu Robert Romawia Royte chuan thu sawiin, Kum 2019 a office hnathawh ni hmasa berah, Commerce & Industry Minister Pu. Dr.R.Lalthangliana’n Aizawl East II Bial a tlawh chu, mipui aiawhin lawmthu a sawi a. New Market Building hi mi sanghnih zanga dawnin eizawnna hmun atan an hman avangin, sawrkar pawhin tih tak zeta a hmunhma sak that nan leh Bazar chawhmeh zawrhna ringawt nilo, tangkai dang zawka hman theihte pawha siam turin leh tan lak pui turin Commerce & Industry Minister Pu. Dr.R.Lalthangliana chu a sawm bawk a ni.

New Market Building hi NEC atangin Rs 13 crore hmuh niin, Kum 2015, October thla atanga sak a ni a, Lushai Engineers te’n building sak hna hi an thawk a ni. New Market Building hi Floor 7 a sang a ni a, floor tinah Fire Hydrant dah a ni. Tun dinhmunah hian lift siam zawh loh niin, luah theih tepa siam mek a ni.