Vawiin khan Champhai South bialtu MLA Pu TJ Lalnuntluanga, Transport, Environment Forest leh Law Minister chuan Champhai District Hospital tlawhin Hospitalin a mamawh hrangte hrangte a sawipui.Pu TJ Lalnuntluanga chuan Hospital Ward hrang hrangte tlawhkuala hun a hman zawhah District Medical Superintendent Office-ah meeting a neih pui nghal a ni.

Pu TJ Lalnuntluanga, Minister chuan chief Minister Pu Zoramthanga bul lo tan tawh District Hospital tih changtlun zel chu a duhthusam ber a nih thu sawiin Hospital in a mamawhte chu Short term leh long term policy a kalpui a tum thu leh short term-ah chuan Doctor leh Nurse te dah belh a tum thu tarlangin an mamawh staff engemaw zat an neih belh a beisei thu a sawi bawk.

Minister chuan District Hospital in ICU a mamawh ni a sawiin ICU nei thei tura an mamawh te a sawipui a, Champhai mipuite bakah khawchhak lam thleng pawh a pan tlak damdawi in a nihna tur leh Aizawl pan kher ngai lova Champhaiah thlamuang taka mipuite awm theihna tur a District Hospital duan chu a duh ber a nih thu a sawi a. Hmun dang pan kher ngai lo tura an mamawh te a sawipui nghal a, District Hospital in a mamawh hrang hrangte hi a vei a veitu ni lovin a tak a tih hi kan mamawh a ni a ti a. Champhai South bialtu MLA chuan mamawh tak tak te tarlang turin a sawm a, Aizawl a let velah Health Minister leh chief Minister te hemi chungchang sawipui tura hmuh nghal a tum thu a sawi bawk.

Dr. Zatluanga, District Medical Superintendent chuan Meeting hi kaihruaiin District Hospital ngaihsak em em tu leh Hospitalin harsatna hrang hrang an neihte sawipui tur Minister Champhaiin a nei chu lawmawm a tih thu a sawi a ni.
Tun dinhmunah District hospital hian Hnimhlum pe tu Doctor leh a pekna khawl thar te, naute hemna tur, Ambulance leh Staff Bus te an mamawh zual ni a tarlan a ni a, hetihlai hian thawktute indaih lohna avangin 100? beded a kal turah 75? beded chauh kalpui a nih thu leh Generic drug store (Damdawi man tlawm zawk a zawrhna) pawh an mamawh thu tarlan a ni.

Tunah hian District Hospital ah hian thawktu Doctor 14 awm mek in On Call la 11 an awm a, Doctor 6 tal pe thei se an duh thu tarlangin nurse 25 ah 5 te chu a nghet a thawk niin a dang 17 te chu contract a thawk mek an nih thu tarlan niin hmanrua awm se chuan cancer natna hmunpui zawka refer reng ngai lovin District Hospital Surgeon te'n an enkawl theih reng thu Doctor te hnen atangin ngaihthlak a ni a, theih tawpa hmalak pui turin Minister hi an ngen a ni.

Pu TJ Lalnuntluanga'n District Hospital a tlawh zawh hian veng hrang hrangah kawng siam ngaite a enfiah chhunzawm nghal a, Kanan Leimin siam dan tur te, Kanan Field panna kawng zim tih zauh dan tur te,  Hmawngbungbu leh Zotlang inkar kawng siam mek te, Sapsakeilamlian kawngte chu a enfiah bakah Chalchung Run atanga Electric veng panna kawng kual lai zauh dan tur te, Auditorium sakna hmun tur DC hmun hlui te enfiahin Vengthar atanga Zote panna kawng siam that dan tur bakah Tlangsam leh zotlang inkar kawng thawm that dan turte a hmunah kalchilh in a enfiah a, heng kawngte siam tur hian theih tawp a chhuah tur thu leh Veng hrang hrang VC te chu thlawp tur leh an theihna zawn apiangah thawhpui ah a sawm bawk a ni.