Vawiin chawhnu khan Information & Public Relations (I&PR) Minister Pu Lalruatkima leh I&PR Department hotute leh officer-te inhmuhkhawmna a pisaah neih a ni.

I&PR Minister chuan inkawm hona hun tha tak neih a ni chu lawmawm tiin I&PR chu sawrkar department upa pawl leh pawimawh tak a ni, a ti a. I&PR Department chu sawrkar hmalakna scheme leh programme hrang hrang puangzar a, mipui kaihruaitu an ni, a ti a. Kalkhawmte hnenah chuan sawrkar hmalakna mipuite hnena hrilhdarhtu leh zirtirtu in ni tiin MJA nena thawhhona tha tak nei chhunzawm zel turin a fuih a. Department enkawl Mizoram Art Development Society (MADS) leh Mizoram Film Forum (MFF) hi tangkai taka kan kalpui a ngai a, thalaite tan pawh talent chherchhuahna atana kan hman ngei theih nan tan lak a ngai a ni, a ti a. Thu chhia leh thu tha inhrilhtawn thin turin a chah a.  Theihtawp chhuaha tan la zel turin duhsakna a hlan a ni.

He hunah hian I&PR Director Pu David L. Thangliana chuan department harsatna te, hmalakna te, hmachhawp te a tarlang a. I&PR Jt.Director Pi Lallianpuii chuan I&PR Department pawimawhna leh hnathawhna a tarlang tel a. Directorate hotute leh officer-te an tel kim hle a ni.