2085/2023-2024

Hnahthial the 30th September 2023: South Chawngtui Solar Pumping Scheme, cheng 352,75,000 senga siam chu vawiin khan Health & Family Welfare Minister leh South Tuipui AC Bialtu MLA ni bawk Dr R Lalthangliana chuan a hawng.

He hawnna inkhawmah hian Minister chuan South Chawngtui khua in a mamawh em em, tui hnianghnar tak an neih theih nana nizung chakna hmanga tui pump na (Solar Pumping Scheme)tha tak hawn a ni ta chu lawmawm a tih thu a sawi a, vantlang mipui tan thil chhinchhiahtlak tak leh hmasawnna ropui tak a ni tiin tangkai taka South Chawngtui leh a chhehvel khua ten an hman theih nan duhsakna a hlan bawk.

Minister chuan hmanni lawka Cabinet thutlukna a South Chawngtui High School Lumpsum Aided atanga provisional Adhoc Grant-in-Aid a hlankai a ni ta chu a lawmpui hle thu a sawi a, zirlaite bakah zirtirtute leh nu leh pate ah chona thar pe se, thahnemngaihna leh taimakna nên mithiam chherchhuah nan hmang turin a chah a, tunlai inelna khawvelah mi hlawhtlingte chu mi invawng thei leh ti tang tang peihna nun neite an ni tiin South Chawngtui atangin lehkhathiam tak tak, Zoram nghahfak an chhuak thei a ni tih ring nghẹt tlat turin leh ‘ka thei ve a ni’ tih rilru pu a chhel taka inbuatsaih thin turin kalkhawm mipuite a chah a ni.

Covid hri leng leh hun harsa tak karah Mizoramah hmasawnna hmuh tur a tam hle chu thil chhinchhiahtlak tak a ni a ti bawk. Hriselna a pawimawh hle tiin tui in tam leh insawizawi uar turin kalkhawmte chah bawkin tui hnar leh ram leilung hausaknate chu ram rohlu a ni tih hriaa, humhalhna kawngah mawhphurna sang tak an neih vek thu hre reng turin a chah bawk a ni.

Solar Pumping Scheme hawnna inkhawm hi South Chawngtui VCP Pu Lalngurliana Sailo chuan a kaihruai a, PHED Hnahthial WATSON Division, EE Er Darthangvunga chuan technical report pein Er C Lalmuankima, SDO, PHED Hnahthial WATSON Sub-Division in lawmthu sawiin hun a khar a ni.

Vawiin a hawn tak Solar Pumping Scheme hi Jal Jeevan Mission (JJM) hnuaia siam a ni a, nitin darkar 6-7 chhung tui pump thei tura ruahman a ni. Tun dinhmuna an reservoir neih len zawng chu 50,000 liters đăwng thei niin tui connection nei chhungkaw 159 chawm zo tura ruahman a ni.