2084/2023-2024
Aizawl the 30th September : School Education Minister Pu Lalchhandama Ralte chuan nimin (29.9.2023) khan Ministry of Education thuneitute a dawr a, Sorkar laipui scheme hnuaia Mizoram zirna atana thil țul leh pawimawhte a thlen.
Pu Lalchhandama Ralte chuan nimin khan Ministry of Education Additional Secretary Vipin Kumar leh Joint Secretary Prachi Pandey te N.Delhi-ah a dawr a, Samagra Shiksha leh PM Poshan scheme hnuaia Ministry-in Mizoram tana sum a la pek chhuah loh te chu a rang lama pe chhuak thuai turin a ngen, a ngen ang hian Ministry hotute hian kar leh lama pek chhuah theih an beisei thu an hrilh.
School Education Minister hian Hindi teacher 855 awm mek, Ministry of Education-in 812-a a tihtlem chu Hindi teacher awm zata tipung leh turin a ngen a, MoE hotute hian ziaka thehlut tur leh lo ngaihtuah an tum thuin an chhang. Tun hnaia Adhoc Aided School ațanga sorkar school-a hlankai thar te chu Minister ngenna angin sikul dinhmun chhinchhiahna UDISE-ah siamțhat an lo phalsak a, hemi behchhan hian sorkar sikula hlankai tharte tan hian sorkar sikulten an dawn țhin a thlawna sem Uniform grant, text book leh composite grant te pek ve nghal a thuphungin an lo remti a. Mizoram sorkarin Adhoc Aided ațanga sorkar sikula hlankai te hi hriattirna a tihchhuah hunah an chanvo tur hi dil an lo phalsak a, kum thar annual plan siamah dinhmun thara hlankai sikul 180 ten an hlawkpui dawn a ni.
School Education Minister-in Ministry of Education thuneitute a dawrnaah hian Minister hi SPD Samagra Shiksha & Additional Director Pu Lalhmachhuana'n a țawiawm a ni.
