Vawiin khan Health Minister Dr. R. Lalthangliana’n Mizoram AYUSH Doctors’ General Conference vawi 14-na chu McCabe Hall, Aijal Club ah a hmanpui.

Health Minister Dr. R. Lalthangliana chuan AYUSH Directorate thar piang ta chu lawmawm a tih thusawiin hei hi mi pahnih khat thil tih ni lovin AYUSH doctor te tan tlana leh a thawktu ten thil an bawhzui chak vang nia a hriat thu a sawi a. Directorate thar anih dawn avangin a tir atanga a fu kekimin a awm thei dawn lo tih chu thawktu ten hria sela tia a duh thu sawiin AYUSH Directorate hmun hma te buatsaihna kawnga theihtawp chhuahin, kawng dap mek anih thu te thu a sawi lang a. AYUSH Doctor he hun kalkhawmte chu, hemi kawngah hian state dangte awh leh an entawntlak ni thei Directorate dinna kawngah inbuatsaih tlang ila tiin a chah a ni.

Health Minister chuan AYUSH zirchhuak te chu sawrkar a luh tum ngawr ngawr lovin an thiamna kawngah zirna sang zawk research te bei a tan la turin a fuih a. Ramhmul damdawi thatna chungchang sawi langin Dr. R. Lalthangliana chuan AYUSH hmasawnna atan ram hmul damdawi te tangkai zawka dawmdawi siamchhuahna atana a hman tangkai thei a rin thu sawiin hemi kawnga pawh AYUSH doctor te chu zirbingna te nei a, tan la turin a chah a. Ram hmul damdawi te chu hausakna a chantir a, Mizoramin a hlawkna tel thei nan kawng hrang hranga State Medicinal Plants Board hnuaia hmalak tum dan te pawh a sawilang bawk a ni.

Sik leh sa leh Boruak inthlak danglamin khawvel a tihbuai mek dan chungchang sawiin Health Minister chuan Mizoram boruak a nawm avangin nakina tlawhtute te a la nghah dawn a, chuvangin thil kan ngaihtuah thuk peih a ngai a, leh hnam dangin an tih theih chu keini pawhin kan ti thei ve ani tih rilru kan nei a ngai a, chutiang turin kan ngaituahna leh rilru te a tute pawhin kan buatsaih a tul a ni, a ti.   

Thusawitu dang Health & Family Welfare Department-a Principal Director leh AYUSH Department Director ni bawk Dr. F. Lallianhlira pawhin thu sawiin AYUSH doctor te chu mipui AYUSH an hriat larna atan theihtawp chhuah a, tan la turin a fuih a ni.

Conference hawnna inkhawm hi an pawl President  Dr. C. Vanllahlimpuia’n kaihruaiin General Secretary Dr. Lalchhuansanga Pachuau hnen atangin kum kalta a pawl hmalakna ngaihthlak a ni a. Chawhnu lamah Scientific Session te neiin hun a hmang bawk a ni.

Mizoram AYUSH Doctors’ Association ah hian member inziaklut, mi 189 an awm mek a, Sawrkarin a nghetin AYUSH doctor post 11 neiin hna an thawk mek a, National AYUSH Mission a thawk engemaw zat an awm bawk a. Tunah hian a ngheta thawktu doctor 20 lakna turin hma lakna a kal mek a ni.