Vawiin khan Lawngtlai District Consultative Committee, District Level Review Committee leh District Level Security Committee chu Lawngtlai DC Conference Hall-ah an thu khawm a. He thut khawm hi Chairman, Lawngtlai Bawrhsap ai awhin Sub-Deputy Commissioner Pu Lalsanglura MCS chuan a kaihruai a, Lead Bank office, RBI representative, NABARD representative, bank hrang hrang leh line department ai awhte an tel.

Chairman, Pu Lalsanglura chuan kum 2019-20 sawrkar kum chhunga Lawngtlai District-a bank hrang hrangte hma lak dan tur ruahmanna, Annual Credit Plan 2019-20 chu tlangzarhin, he ruahmanna hi tha taka zui a, tihhlawhtlin tum tur leh, a theih phei chuan a aia thaa thawh hial pawh tum turin bank ai awh kal khawmte chu a chah a. Line department-te nen pawh an thawh chhan mipuite tana theih tawp chhuaha tang ho turin a chah.

He hunah hian kumin 2019 January atanga March thla (4th Quarter) chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni a. Bank leh mipui sum vawn himna (security) lam te, pawisa leng vel (currency management & remittance) chungchang te, khua leh tuite hamthat nana sawrkar laipui ruahmanna hrang hrang - Stand-Up India, PMAY (Housing for All) leh Women Self Help Group lama bank hma lak dan te sawi ho a ni bawk.

He thut khawmah hian agriculture kaihhnawih loan pek chhuah lama tan lak a tul thu sawi lan niin, zirna kaihhnawih leh mipui hamthatna hrang hrang puanzar kawngah bank leh line department-te'n tan la leh zual se, tih a ni a. Credit link scheme-a mipuite harsatna tawh thin sut kian dan turte pawh sawi ho a ni.