Lawngtlai District Information & Public Relations Office leh MJA Lawngtlai District tang kawp buatsaihin vawiin khan Lawngtlai DIPRO office-ah journalist-te intuai tharna "Journalists' Refresher" neih a ni.

He hun hi District MJA Vice President Pu Lalngheta Ralte chuan kaihruaiin, Secretary Pu Elvis Lalthangzuala'n hunserh a hmang a. Lawngtlai DIPRO Pu C. Lalhruaitluanga chuan khawvel thiamna sang chho zela media hmelhmang danglam chho zelah journalist-te tan nasa zawka tan lak a tul thu a sawi a. Internet beh chhan new media hman tangkai kawngah journalist-te chuan hak zauh thiam se a duh thu sawiin, journalist-te chu mipui rin hlawh ber an nih avangin social media-a thu belhchian dawl lo thehdarh a awm chang pawha thu dik zawk hai chhuak a, puangzartu nih tum turin a chah.

District MJA President Pu ZD Dengngura chuan Information & Public Relations Department-in journalist-te hmakhua ngai a, kawng hrang hranga hma lakna a kalpui thin chu lawmawm a tih thu sawiin, journalist-te chu chhungkua pawh awp lum hman lo khawpa buai thin an nih avangin intuai tharna hun pawh an nei hleithei lo fo tih a sawi a. Chanchinbu enkawl leh thu thar theh darh kawnga tawn hriat tam tak nei tawh tan pawh intuai thar a, inzir belh reng a pawimawh avangin chuti ang hun chu a ngaihlu thin hle tih a sawi. I&PR leh chanchinbu mite chu a tha lam kawnga mipui rilru sukthlek thlakthleng thei an nih avangin, thu thar puanzar mai piah lamah, thil tha zirtir kawngah pawh tan lak sauh sauh a tul thu a sawi lang bawk.

Lawngtlaia journalist-te intuai tharna buatsaihah hian District MJA member-te leh DIPRO leh staff-te an tel a. Thu sawi hrang hrang ngaihthlak a nih bakah, media tangkaina leh journalist-te tih tur leh tih loh turte sawi hona hun hlawkthlak tak hman a ni bawk.

Attachment

  • Loading attachment...