3544/2022-2023
Lunglei the 10th February, 2023 – Christian Hospital Serkawn (CHS) chuan an kum za tlin lawmna Centenary Celebration chu vawiin chawhnu khan BCM Hall, BCM Headquarters Office, Serkawnah an hmang a. He hunah hian H&FW Minister Dr R. Lalthangliana chuan khuallian niin a hmanpui.

Centenary lawmna inkhawm Rev R Lalnunzira, AGS, Service BCM kaihhruaiah Dr R. Lalthangliana chuan Christian Hospital Serkawn din tan kum 1923 atanga tun thlenga Zoram mipuite tana an hnathawh leh rawngbawlna chu ropui leh fakawm tiin kalkhawmte Centenary chibai a buk a.

Tihdam rawngbawlna kawnga CHS thawktute thawhrimna leh inpekna chu fakawm tiin khawvel pum huapa buaina thlentu Covid-19 do letna kawnga an hnathawhte, Baptist Covid Care Centre hawnga, Covid positive te hmangaih taka anlo enkawlna avang te in thawktute chungah lawmthu a sawi bawk a ni.

Health Minister chuan kan ram hmasawn zelna turin mipuite damna leh hriselna a pawimawh hmasa ber a ni tiin kan health infrastructure-te ti changtlung zel turin sawrkar chuan chak takin hma a la mek zel a, Japan International Cooperation Agency te nena tangkawpin Cancer Superspeciality Hospital din tum mek a ni, a ti. Heng bakah hian hospital awmsa tih changtlun, khawl ruahman belh leh Sub Centre, PHC-te tih changtlun kawngah te pawh hmalak chhoh zel a ni, a ti a. Mizorama hospital leh medical college-a thawktu tur Mizo mithiam kan indaihloh fo thin thu pawh sawiin Health Minister chuan zirlaite leh thangtharte chu tan la thara, heng mamawhna te chhang thei tura ke rawn pen chhuak turin a sawm a ni.

Dr Lalramzauva, Director, Medical & Health Department BCM chuan CHS chanchin tlangpui leh hmalakna pawimawhte Report a pe a. Christian Hospital Serkawn hi February ni 10, 1923 ah khan bultan a ni a, Mizorama Mission Hospital hmasa ber niin Sawrkar Hospital chhiar telin Mizorama hospital 3-na a ni. A hawngtu hi Mrs WL Scott, Mizoram Bawrhsap nupui a ni. Nursing zirna hi kum 1919 ah lo bultan tawh niin kum1921 ah pharmacy neih a ni a, kum 1921 ah damdawi in hi sak tan niin February ni 10, 1923 ah luah luh a ni. He hospital-ah hian inzaina operation theater kum 1931ah neih a ni. CHS awmchilh Doctor hmasa ber Dr HG Stockley chuan kum 1957 ah zawmin CHS-a Mizo doctor thawk hmasa ber chu Dr C. Silvera (1964) a ni. Report ah hian CHS hmasawnna rahbi hrang hrang - x- ray khawl neih hmasak ber (1971), hnimhlim khawl, ultrasound, endoscope khawl neih (1994), CMC Vellore zawm (1998), Lawngtlai Hospital din (2007) leh mellung pawimawh dangte tarlan a ni.

Centenary Souvenir Magazine Editor Dr. B Laldinliana kaihhruaiin magazine release na hun hman niin Rev. Dr. R Lalthanmawia, AGS Mission BCM chuan Magazine hi a tlangzarh a ni.

CHS Centenary lawmna pual hian Rev R. Lalbiakliana, General Secretary, BCM in Hospital Centenary Building thar a hawng a ni.

Centenary Building report hi Er Victor Lalrinawma Sailo, Director Property Department BCM in a pe a. Building sak hna hi Jannuary 2021 kum tirah bul tanin lungphum phum a ni. A sak hna hi BCM Property Department ten Departmental work angin an thawk a ni. A building hi L-Shape zopa sawia chhuat 4 (floor) a sak tur a ni a, hmarlam ah ft.100 a sei, chhak lamah ft 90 a ni a, a vang hi ft 32 a ni. Basement floor hi Parking etc.atan te, Ground Floor ah Radiology block (Lithotripsy, Ultrasound, Xray, CT Scan etc.) First Floor ah Blood Bank, Donation room, Counselling leh a dangte ruahman a ni.