Vawiin chawhnu khan Health & Family Welfare Minister Dr. R. Lalthangliana’n CYMA hruaitute a pisa ah kawmin Mizorama HIV darh zel do let dan tur chungchang chipchhiar takin an sawiho a. Health & Family Welfare Department leh Mizoram AIDS Control Society (MSACS) hotuten Minister hi an tawiawm a. Meeting ah hian CYMA President Pu Vanlalruata leh a thawpui CYMA hruaitu 5 an tel a ni.

Health Minister Dr. R. Lalthangliana chuan kumin chho a HIV dinhmun tarlanna thar ber chhuak a, Mizoram dinhmun chu a sang filawr ta chu a veiawm hle tih sawiin tunhnaia doctor pawl te, Kohhran hruaitute leh tun tumah CYMA hruaitute lengah sawmin he thil hi engtia ralpui do a do chi nge tia sawiho tha a tih avangin inkawmhona chu rawtchhuah a ni thu a sawi a. CYMA chu Mizorama pawl lian ber leh huamzau ber anih angin, Mizote tan YMA awm chu malsawmna leh Pathian remruatna ropui tak a ni a ti a. HIV dona kawngah te chak taka, awmze nei taka an thawhho ngei a beisei tih a sawi bawk a ni. Kohhran hruaitute he thil a ngenna chuan rah tha a chhuah thu sawiin Presbytery ah HIV in sawi a hlawh chu a lawmawm a, hetianga kan veitlana kan tanrual chuan HIV dona kawngah hma kan sawn ngei a beiseiawm a ni, a ti bawk.  

CYMA President Pu Vanlalruata chuan YMA chu he thilah hian a tlan chhe dawn lova, a phak tawkin HIV dona kawngah theihtawp a chhuah dawn a mahse kan ram milin enge  tha ber ang tih chu kan  ngaihtuah leh sawiho tlan tul a tih thu a sawi a ni.  

He sawihonaah hian ngaihtuah tura chhawpchhuah engemaw zat MSACS lamin an nei  a. Chungte chu – YMA chanchinbuah te, thlan laih nikhua leh khawhar lenpui hunah te HIV/AIDS chungchang zirtirna sawi zau te; CYMA bultuma Aizawl khawpui huamchhunga YMA Branch te kokhawm HIV Sensitization programme buatsaih te; HIV darh zel venna atan ‘Harm Reduction’ kawng awm te kalpui theih a ni em tih ngaituah te; HIV hrik pai ART damdawi ei chhunzawm ta lo YMA tanpuina a chhui te; SRS tih chak dan te leh HIV dinhmun hre tura thisen endikna zau taka kalpui dan te an ni.