Agriculture Department hnuaia Insecticide Inspector te tan vawiin khan Agriculture Directorate Committee Room-ah training buatsaih a ni.

Mizoram Sawrkar-in District tin tan Agriculture Department-a thawk lai Insecticide Inspector pakhat zel a mat a. Insecticide Inspector atan hian Agriculture Science-a Graduate chin leh a chung lam te chauh mat theih a nih angin, chutiang mi chu mat an ni. Heng Insecticide Inspector atana mat te hi training nei ngei turin Ministry of Agriculture chuan a ti a. Vawiina training pawh hi Directorate of Plant Protection, Quarantine & Storage, Faridabad atanga mithiam lo kal ten an rawn hmanpui a. Heng mithiam lokal te hian zirtirna hun hlawk tak an rawn hmang a. Insecticide chu hman suala thil pawi tak thlen thei a ni a. Insecticide lem leh thi tawh lo zuar leh hralh mai thin te hrem theih dan te, chung mite man chhuak tur chuan heng Insecticide Inspector te hi thuneihna sang tak pek an nih thu te an sawi a. Insecticide Inspector te pawh an thuneihna hmang tangkai tur te, a zuartuten insecticide hman tlak ngei an zuar em tih te, a hmangtuten a hman dan tur dik takin an hmang em tih te enfiah fo turin an chah a ni. Dawra insecticide zawrh te pawh a sample laa endik ngai nia an hriat te chu laboratory-a thawn thin turin an chah bawk.

Training-a tel Insecticide Inspector te chuan training chu hlawkthlak an tih thu an sawi a, Dan anga Insecticides Act leh Rules te pawh District tinah kalpui a nih theih nan theih tawp chhuah an turn thu an sawi.

Mithiam lokal te hian Insecticide zawrhna dawr thenkhat an tlawh a, an thil zawrh leh hralh kawngah fimkhur tur leh Dan ang thlapa thil ti zel turin an chah bawk. State Pesticide Testing Laboratory, Neihbawiha hman mek pawh a hmunah an tlawh dawn a ni.