Vawiin chawhma khan Convention Centre, Lunglei-ah District Child Protection Unit (DCPU), District Legal Services Authority, Samagra Shiksha, Women & Child Development te tangkawp buatsaihin “Happy Childhood” tih thupui hmangin Childrens’ Day lawmna programme buatsaih a ni Lunglei DC Pi K.Lalrinzuali chuan khuallian niin a hmanpui. 

Lunglei DC Pi K. Lalrinzuali chuan Naupangte Ni puala programme ropui tak buatsaih a ni chu lawmawm a tih thu sawiin Lunglei District chhunga naupangte Childrens' Day lawmpuina chibai a buk a. Naupangte hmangaih taka enkawla an dikna chanvo humhalh kawnga nasa taka hnathawktute chungah lawmthu sawiin ram leh hnam tana mi hlu leh pawimawh tak an ni, a ti. Naupangte chu nakin lawka kan ram hruaitu tur an nih avangin uluk leh thiam taka kan enkawl chhoh a tul a ni tiin nu leh pa, zirtirtute leh anmahni enkawltuten hemi kawnga kan mawhphurhna a san zia kan hriat nawn leh fo a tul a ni, a ti. Naupangte chu rilru beidawnna leh lungngaihna an neih changa Pathian hnena thlen thin tur leh anmahni hmangaih em em tu mi tam tak an nei a ni tih hre reng thin turin a chah bawk. 

Hemi huna thu sawitu dang Pi Lalrinkimi Hmar, DCPO Lunglei chuan programme buatsaih tura an inpuahchah dan tlangpui  leh an Department hmalakna hrang hrang sawifiahna hun a hmang a. Mizoram District hrang hrangah Childrens Day pualin District Child Protection Unit te buatsaihin programme hman a nih thu a sawi bawk. 

Vawiin programme ah hian a kaihhnawih sawrkar Department hotute bakah Child Welfare Committee leh Juvenile Justice Board member te an tel a. Lunglei leh a chhehvela home leh school hrang hrang – Bethel Centre, KK Boys Home, Special Home Ramthar, Onyx Special School, Baptist Church Orphanage, Montessori School,Lunglei Child Care Centre leh Observation Home-a naupangte leh enkawltute mi thahnem tak an kalkhawmin programme hlimawm tak an hmang ho a ni.