Vawiin khan Health & Family Welfare Minister Dr. R. Lalthangliana chuan Zembawk Urban Primary Health Centre (UPHC) Health & Wellness Centre a hlankaia, a hmun hma thar (building) a hawng a. He programme hmang tur hian Ayushman Bharat programme a India Sawrkar thawhpui Johns Hopkins University affiliate NGO Jhpiego USA, hotu ber Dr. Leslie Mancuso, President &  CEO leh a thawpui midang 5 te an rawn kal a ni.

Health & Wellness Centre hawnna inkhawm a Health Minister Dr. R. Lalthangliana chuan thu sawiin UPHC Zemabawk hetiang dinhmun a din theihna chu Sawrkar hmalak na vang ngawt ni lovin khawtlang  mipui te tanrual avang awm a ni a ti a. Local Council in he UPHC  dinna tur hmun  ram YMA enkawl in an thawh hi a entawntlak a, khawtlang hruaitu Local Council leh NGO hrang hrang leh mipui te intanrual vang a tun dinhmun thleng thei kan ni a tiin he intanhona  hi Zoram hmun dang tan entawn tlak ni in ka hria, a ti bawk. Zemabawk a cancer inenkawlna tur cancer specialty centre leh hospital cheng vaibelchhe 500 hu man JAICA sum a ruahman tum mek anih thu leh cheng vaibelchhe 480 a RIPAN tihchangtlunna Central Sawrkarin a rawn ruahman fel te chu Minister hian sawilangin heng ringawt avangte pawh hian Chief Minister bial Aizawl East I bial chu bial vannei in ni a, nasa takin heng ruahmanna te a puitlin hunah bial hmel a tidanglam dawn a ni, a ti.

Health Minister chuan tunhnaia Mizoram in hriselna kawnga a tih thatna leh hma sawnna awm te a thusawi tarlangin kum 2010 SRS survey report a Mizoram IMR (Nausen kum khat hnuai lam thi zat tehna)  hi 37 a ni a, SRS Bulletin thar ber May 2019 a tihchhuah a, kan IMR  hi 22 laia tla hniamin tunah chuan 15 a ni ta; NITI Aayog in June 2019 a Health Index Card an tichhuah a, state tenau Small State ah Mizoram chu ti tha ber niin point 74.97 kan hmu a, state lian zinga ti tha ber Kerela in point 74.01 an hmu a, anni aiin point 0.96 in kan la sang a, kan dihmun hi India rama chuan a sang ber niin a lang a ni a ti a. Minister chuan heng kan dinhmun te hi a chhuanawmin a lawmawm a, mahse hei hi duhtawk mai lovin hriselna hmalakna tehkhawng hrang hrang (Indicators) ah Target kan set tur a ni ti a. IMR tun kum 2/3 chhungin 10 hnuai lamah dah tum anih thu te, Maternal Mortality Rate (Nu naupai leh nau hrin kaihhnawih a thihna tehna) hi kum 3 chhungin 50 hnuai lamah dah tum anih thu te, Nu Raipuar, rai tirh thla thum (First Trimester) chhunga Sub Centre a in register zat tun kum 3 chhungin za zelah 90 tal tlin tum anih thu te leh nausen aa zela hridanna la kim (Fully Immunised) tun 3 thum chhungin za zelah 100 ah kai tum thu te chu tarlangin Health Minister chuan hei hi kan Destination Target a ni a, hemi hi kan thlen thei nan Deapartment a thawk zawng zawngte chu theihtawp chhuah a hna thawk turin ka duh cheu ni, a ti.

Dr. R. Lalthangliana chuan Mizoram puma Primary Health Centre leh Sub Centre te thuam thar a Health and Wellness Centre a leh vek tur a hmalakna kal mek chu kan sawrkar in theih tawpa chhuahin taka tihhlawhtlin a tum mek a, kum 2022 thlengin hei hi kan tihthlawhtlin a beiseiawm a ni, a ti.

Jhpiego Vice President leh CEO ni bawk Dr. Leslie Mancuso chuan an NGO in India chu kum 40 lai a lo thawhpui tawh tih sawiin Ayushman Bharat katlangin a bik takin Health & Wellness Centre changtlung tak Mizoram hmun kilkhawr tak takte a awm ngei a a beisei a ti a, heng kawngah Mizoram Sawrkar chu engtik lai pawha thawhpui an in hawng reng thu a sawi a ni. Mizoramin Universal Health Coverage a hma an lakna te chu tha nia a hmuh thu te pawh a sawi tel bawk a ni.

Programme hi Health & Family Welfare Department Secretary Pu H. Lalengmawia, IAS chuan kaihruaiin Dr. F.Lallianhlira, Principal Director, H&FW  Department, Dr. Eric Zomawia, Mission Director, NHM te pawhin hun hmangin Dr. Bulbul Sood, Country Director, Jhpiego India pawhin thu sawina hun a nei a ni.

Zemabawk UPHC tuna Health & Wellness Centre ni ta hi kum 2004 khan Urban Health Centre anga bul tan niin 2014 khan Urban Primary Health Centre ah hlankai a ni a, March 2018 ah tunah an awmnaah an in bengbel in Health & Wellness Centre ah vawiin khan hlankai a lo ni ta  a ni.

Health and Wellness Centre dinhmun a hlang kai chu hetiang hian thuam chak thar vek tur a ni. Building thuam thar leh a tul anga sak thar te, a thlawna Laboratory Investigation tih theihna tura thuam te, Damdawi  tam zawk a thlawna dawn theihna tur a thuam te, Sub centre ah Thawktu  a tul dan anga damdawi phal chin chawh ve thei tur – Mid Level Health Provider  (MLHP)  B.Sc. Nursing emaw  Nurse  thar,  a hranpa a  training chhuak pakhat dah belh vek tur te, Thawktu – Nurse (MLHP), Health worker leh ASHA te thiamna tihpun a Medical Emergency, Raipuar, Nu hriselna leh Family Planning, Nausen leh Naupang hriselna service pek te, Mit, Hrawk, Beng , Ka chhung (oral)  hriselna enkawl thei tur a an thiamna tih pun te, Zunthum, BP sang, Cancer thenkhat  leh NCD natna dang te leh Inkaichhawn theih chi natna benvawn thenkhat te dap chhuak thei tura an thiamna tih pun te, Palliative Care- natna tihdam theihloh vei te tana chhawmdawlna tha zawk pek te, Rilru hriselna leh kum upa Tar te enkawl thiam tura an thiamna tuai thar tur te leh Computer/ Laptop dah vek a, chu mi hmanga Programme hmalakna cloud emaw Internet kaltlanga  report thehluh thin te chu heng Centre te hian an keng tel tur a ni.