Lawngtlai District-a hma sawnna chak leh awmze nei zawk a awm theih nana hma la tura din District Planning Committee chu vawiin khan Lawngtlai DC Conference Hall-ah SDO (Sadar) Pi Rochuangkimi Khenglawt hovin an thu khawm.

Pi Rochuangkimi Khenglawt chuan department hrang hrang te'n an hma zawn theuhva hma sawnna tur ruahmanna an siam chu ngaih pawimawh hmasak bera neih tura chahin, ruahmanna a that phawt chuan hma sawnna pawhin awmzia a nei thei dawn a ni, a ti.

Member Secretary, District Research Officer Pi H. Chhunkungi chuan tunlai hian Lawngtlai District-a khaw hrang hrangte chu an khuain a mamawh nia an hriat thil pathum DRO hnena theh lut turin an ti mek tih sawiin, hemi hmang hian sawrkar leh mipui tan hona atangin Action Plan fel tak a siam theih beisei a nih thu a sawi.

District Planning Committee hi state sawrkara Planning & Programme Implementation Department hnuaia din niin, Centrally Sponsored Scheme-in a huam tel loh, hma sawnna hna hrang hranga department-te'n ruahmanna an siam zinga District Planning Committee-in pawm tlaka a ngaihte chu Planning & Programme Inplementation Department-ah theh lutin, chumi hmang chuan hna thawh a ni thin dawn a. Vawiin meeting chuan Lawngtlai District-a department hrang hrangte chu action plan an siamte September ni 25, 2019 hmaa theh lut vek turin a ti a ni.

Vawiina District Planning Committee thut khawmah hian sawrkar department hrang hrang leh tlawmngai pawl ai awhte an tel.