No.4130/2021-2022
Aizawl, the 28th February 2022 : Health Minister Dr. R. Lalthangliana’n vawiin khan Mizorama lo zin mek Union Minister of State for Health & Family Welfare Dr. Bharati Pravin Pawar chu MINECO Conference Hall ah meeting a neih pui a, hriselna kawnga an ngaihpawimawh thil hrang hrang te meeting ah hian sawi niin Health Minister chuan Mizoram mamawhte Union Minister hnenah ziakin a thlen bawk a ni.

Dr Bharati Pravin Pawar chuan presentation hrang hrang a ngaihthlak hnuin National Health Mission hnuaia ECRP Package I leh II a Mizoram in sum a dawn zat te, 15th Finance Commission hnuaia hriselna atana sum Mizoramin a dawn te, Pradhan Mantri – Ayushman Bharat Health Infrastructure Mission(PM-ABHIM) hnuaia sum dawn te zawtin heng hnuaia hma lak dan te pawh a zawt a. Mizoram Cancer Institute mamawh thenkhat te chu PM-ABHIM hnuaia proposal siama thehlut turin thurawn a pe a. Covid-19 hripui dona kawnga Mizoram hma lakna a hriat te chu tha a tih thu a sawi bawk.

National Family Health Survery thar bera Mizoram dinhmun thenkhat tarlan a bik takin anaemia tam dan tarlan te, zuk leh hmuam chungchanga Mizoram dinhmun tarlan te leh nu naupai leh raipuar te a hun taka inentir kawnga hnufualna nia langte siamthat nan tan lak theih nise tiin a duh thu a sawi. Health Department officials te chu thingtlanga hriselna dinhmun ngaihpawimawh zual tur leh henga inenkawlna hmun – CHC, PHC lehh Sub Centre te chu tlawh fo thin turin a chah a ni.

Health Minister Dr. R. Lalthangliana chuan Covid hripui dona kawnga scheme hrang hrang atanga damdawi leh hmanrua Mizoramin a dawn leh tunhnaia AYUSH lamah Mizoramin duhsakna a dawn ah te Union Minister hi lawmthu a hrilh a. PHC leh CHC a Ambulance hman mek te chu a hlui tawh avangin Ambulance thar 30 Mizoram pe turin a ngen a. Hmarchhak biala state te chu state dang te nen tehkhinin an hnufum bik thu sawiin Minister chuan hmei avangin funding pattern leh guidelines te siamthat leh ennawn a tul a, chumi atan chuan Hmarchhak Health Minister te hova, Union Health Minister pawh tel ngeiin hengte hi sawiho a tul nia hriat thu te a sawi a ni.

Thil dang a thlen te chu – District thar 3 a District Hospital khum 75 awm theuh theihna sakna tur ngaihtuah sak te; ZMC ah lung lam, kal lam, tha leh thluak lam superspeciality dinna kawnga puihna leh lung lam leh kal lam inenkawlna Aizawl Civil Hospital ah neih mek tih len belh leh tihchangtlun kawng dap pui te; PHC leh Sub Centre sak that na tur ngaihtuah sak te; Scheme thar hnuaia ram puma rilru lam enkawlna Mental Hospital 40 din turah Mizoram chu telh ve tura ngenna te; ZMC chu central funding a enkawl dan ngaihtuah te leh a hnuaia ruhrel mamawh zual din belhna tur sum ngaihtuah sak te a ni a. JICA tanpuina hnuaia Mizoram State Cancer Institute tihchangtlunna kalpui mek te pawh a sawilang a ni

Meeting ah hian hriselna kawng hrang hranga Mizoram dinhmun tlangpui te, mipui ten hriselna tha leh inenkawlna thlawm an neih theih nana mamawh hrang hrangte, Mizorama Covid-19 dihmun tlangpui te leh Zoram College dinhmun leh mamawhte chu meeting ah hian Health & Family Welfare Department leh a peng dangte leh Zoram Medical College-a hnathawktuten an tarlang a ni.

Meeting ah hian Health & Family Welfare Board Vice Chairman leh Covid-19 Medical Operational Team Vice Chairman Dr. ZR Thiamsanga; Tuichawng bialtu MLA Dr. BD Chakma; Chief Secretary Dr. Renu Sharma; Secretary, Health & Family Welfare, Secretary Pu Lalramnghaka; Health & Family Welfare Department hotulute leh ZMC Director leh hotu dangte an tel a ni.

Health & Family Welfare tarlan danin Mizoram pumah District Hospital 12; Sub District Hospital 2; CHC 9; PHC 61; Sub Centre 379 leh hmun kilkhawra mipui te hriselna enkawlna atan Health Clinic 170 a awm mek a. Hengah te hian dam lo enkawlna tur khum 2197 a awm mek a. Mizorama mimal leh private damdawi inah khum 1589 a awm bawk a. Department hnuaiah post chi hrang hrang hrang 19 awm mekin, heng hnuaiah hian sanctioned post 3896 a awm mek a; heng zinga 2880 chu hnawhkhah niin 1016 chu a ruak a. 15th Finance Commission hnuaia hriselna kawnga hma lakna atan sum cheng vaibelchhe 31.19 crores hmuh a ni a. PM ABHIM hnuaia kum 5 chhunga Mizoramin sum a dawn tur chu cheng vaibelchhe 28.30 a ni dawn a ni.

Kum 2021-22 chhungin Mizoram State Health Care Scheme hnuaia chhungkua 87,695 inziaklut awm mekin claim 22,589 hnuaia cheng vaibelchhe 59.09 hu a awm mek a. Chutiang bawkin health insurance central lam tih – Ayushman Bharat (PM-JAY) hnuaiah chhungkua 1,94,859 inziaklut awm mekin, claim 11,252 hnuaia cheng vaibelchhe 13.44 hu a awm mek a ni.

Zoram Medical College ah hian MBBS Batch 4 hnuaia zirlai 372 an awm mek a. ZMC leh SRF ah hian thawktu 736 awm mekin chung zinga 142 chu zirtirtu an ni a. Tunah hian khum ICU tiamin 316 awm mekin kumin kum tawp ah chuan khum 500 bawr awm thei tura hma lak mek a ni a. ICMR leh DBT hnuaia Research Project 7 an kalpui mek a ni.

Attachment

  • Loading attachment...