Vawiin khan Planning & Programme Implementation Department buatsaihin Assembly Annexe Conference Hall-ah ‘Sensitization Workshop on District Level Planning’ neih a ni a. Health & Family Welfare, H&TE, etc Minister Dr.R.Lalthangliana chuan Workshop hi hawngin Planning Department Secretary Dr.C.Vanlalramsanga chuan Workshop hi kaihruaiin keynote address a sawi.

District Level Planning Workshop hawnnaah thu sawiin Khuallian Dr.R.Lalthangliana chuan hmasawnna tluantling leh ngelnghet nei tur chuan thingtlang level (grassroots) atanga bultan a ngai a, hemi hriain tuna sorkar thar pawhin a zau thei ang ber huam tur ‘Socio-Economic Development Programme (SEDP)’ chu uluk takin a duang a, hei hi Planning Department leh sorkar department dang zawng zawngte pawhin ngaih pawimawh berah an neih zel a pawimawh dawn a, chuvangin Planning Department lamin zirchiang se a duh thu a sawi. Vawiina Workshop-ah pawh Mizoram pumah a rualkhai zawka hamsawnna a thlen theih dan tur chu sawiho ringawtah duh tawk mai lovin, a tak taka thawk turin kan inbuatsaih chho a tul takzet a ni, a ti. Grassroots (thingtlang) level atanga hnathawhnaah khua leh khawtlang mamawh tak tak thilte ngaihtuah hmasakah nei a, anmahni inenkawl theihna tur kawng dap sak a ngai a, hei hian thuneihna semsawm thiam (power decentralisation) a keng tel dawn a ni, a ti bawk. Power decentralisation hian rah tha tak a nei tur chu thingtlangah pawh hmasawnna kal zel turah a mawhphurtu tak tak turte chu a khua mite, khawtlang hruaitute an ni dawn a, mahni khua leh kahwtlang tan chuan theihtawp an chhuah ngei rinawm a ni, a ti.

Health Minister Dr.R.Lalthangliana chuan thu sawi zelin Socio-Economic Development Programme (SEDP) chuan banpui 5 a nei a, chungte chu : (1). Green Revolution - ei leh bara intodelhna te, ram leilung hausakna haichhuah te a tel a, (2). Industrial development leh thil siamchhuah/dehchhuah hralhchhuahna tur ruahmanna siam, (3). Manpower & Technology development, (4). Mipui dawmkanna tur Social Development & Social Security leh (5). Investments in Mizoram te a ni a.  Heng bakah hian hausakpui tham talent leh potential keypoint resources hrang hrang haichhuah  te, Mizoram-ah Institute of Fashion Technology leh Institute of Skill Development & Entrepreneurship Training din te, Music and fine arts lam tihchangtlun te, Sports training and multi faciltity centres sak belh te, khualzin mite hipna tur kawng hrang hrang dap bakah damdawi siamna pharmaceutical industry din te a tel a ni, a ti. A hmasa berah erawh chuan mipui mimirin an mamawh zualpui tui thianghlim in tur, kawlphetha, kawngpui tha leh zirna tha te dah pawimawh thiam a ngai zel dawn a, heng mipui nghawng thei thila sorkar hmalakna reng rengah bialtu MLA-te tel tir a, anmahni nena inrawn hova hmalak pawh a finthlak zawk ang, a ti bawk.

Sensitization Workshop hawnna inkhawma tel ve Mizoram Speaker Pu Lalrinliana Sailo pawhin thu sawiin Mizoram state hmasawnna tur planning khawihtute chuan District atanga bultan a fuh ber ang tih hi rilruah nei se, tun sorkar hian SEDP hmangin ram siam hna thawh tak tak an tum tih a hriat a ni, a ti. Tun dinhmunah eng kawngah pawh sorkar a inrawlh loh chuan hmasawnna a awm thei tak tak lova, chuvangin eng level-ah pawh power decentralisation sem thiam a, sorkar official leh hnathawkten an mawhphurhna an kengkawh thiam a ngai dawn a ni, a ti bawk. Zirna a tlakhniam a, drop-out rate sanna ram apiangah ram tibuai leh ram tihnawktu an tam thin tih mithiamten an sawi thin a, chuvangin Mizoramah pawh zirna tha neih hi ngaih pawimawh berte zingah awm zel se a duh thu a sawi bawk.

Planning Secretary Dr.C.Vanlalramsanga chuan a Keynote Address-ah UNO hnuaia ram zawng zawngte chuan Sustainable Development Goals (SDGs) 17 pek vek an ni a, India ramah chuan Niti Ayog-in a kalpui laiin Mizoram state-ah chuan Planning leh a line department ten an kengkawh thung a ni tih a sawi a. Khawvel pumin a ruala hmasawn a, tumah inkalsan emaw hmaih bik emaw awm lova hmasawnna tluantling tana thawhhona dah pawimawh ber a ni, a ti. Hmasawnna atana ruahmanna mumal zawk awm theih nan official statistics leh data base rintlak leh kimchang a awm a ngai a, hei hi Mizoram-in a neih that tawk loh avangin tun hnaia SDGs kalpui danah state hrang hrang tehnaah Mizoram chu 13-na chauh kan ni phah a, statistics leh data base kimchang leh rintlak nei ila chuan Top-5 ah Mizoram chu a lang thei hial a rin thu a sawi bawk.

He Workshop-ah hian District Planning Committe (DPC)-in District Planning Process atana hmalak nana a hman tangkai tur inzirtirna hun hman a ni a, line-department zawng zawnga hotulu berte, DPC-Aizawl Member te, Local Council hotute leh Village Council hotute nen sawihona hun hman a ni. Planning Department hnuaia Senior Officer-ten thupui hrang hrang hmangin kalkhawmte an zirtir a. Pu H.Lianzela, Dy. Secretary, Planning Department chuan ‘District Planning Committee (DPC) chungchang a sawi a. Pu Lalchhuanawma Hrahsel, Director of Economis & Statistics chuan ‘Sustainable Development Goals (SDGs)’ chungchang leh ‘Developing Database in the Statistical Cell of Line Departments’ chungchang a sawi a. Dr.R.K.Lallianthanga, Chief Scientific Officer, Directorate of Science & Technology chuan ‘Application of Remote Sensing & GIS for District Level Planning’ chungchang a sawi thung. Zirtirna leh sawihona hun hi Dr.Lalrinchhana, Deputy Adviser, Planning Deaprtment (RDB) chuan a kaihruai a ni.