Vawiin chawhma khan NLUP Conference Hall ah “One Day Training Programme for Government Officials & NGO’s on The Rights of Persons with Disabilities Act, 2016" buatsaih a ni a, he hun hi Dr Lalhriatzuali Ralte, IAS, Addl. Deputy Commissioner in kaihruaiin Pi Chuauzikpuii Pachuau in “The Rights of Persons with Disabilities Act, 2016” chungchangah zirtirna a pe a ni.

Dr Lalhriatzuali Ralte, IAS, Addl. Deputy Commissioner chuan,” Rualbanlote dawmkan leh chhawmdawlna kawngah hian Sawrkar leh NGO te hian mawhphurna pawimawh tak kan nei a, an harsatnate hriatpui a, zirchian a, a tul anga puihbawm leh an theihna zawn apianga mi tangkai a chher chhuah hi a pawimawh hle a ni,” a ti a,”Person with Disability dapchhuah leh enkawlna kawngah hian nasa zawk a inzirtirna kalpui leh The Rights of Person with Disabilities Act, 2016 hi zau zawk a inhrilhhriatna neih a hman tangkai hi a tul hle a ni,” a ti bawk. Dr Lalhriatzuali chuan rualbanloten an duhthlanna leh chanvo an hman ve theihna tura Mizoram MLA election 2018 a “Accessible Election” nasa taka kalpui a nih thu tar langin Zirna In leh Damdawi In ahte pawh rualbanlote tan awlsawm zawka tlawh pawh a nih theih nan hma lak chhunzawm mek a nih thu a sawi bawk.

Pi Chuauzikpuii Pachuau hnen atangin “The Rights of Person with Disabilities Act, 2016” chungchang zirtirna leh sawi zauna neih a ni a training chhim a lo kalte nen zawhna leh chhanna hun hman a ni bawk. He Training hi Social Welfare Department, Health & Family Welfare, Information & Public Relations department, CYMA, MHIP, MUP, Mizoram Blind Society, Spastic Society of Mizoram leh Zoram Entu Pawl a thawktuten an telpui a ni.

The Rights of Persons with Disabilities Act, 2016 chuan rualbanlote zalenna, dikna leh chanvo zah sakna leh duhthlanna hmantir te chu a tum ber a ni a, an danglamnate zah sak a an eizawnna dapna kawnga chhawmdawl an tulna leh enkawl an ngaihnate a ngai pawimawh hle bawk a ni.