Nimin tlai khan Advisory Committee on Medical College chu an Chairman, H&FW Minister Pu Lal Thanzara hovin State Referral Hospital, Falkawn-a Deputy Medical Superintendent Office Chamber-ah meeting an nei a, hospital leh college dinna tur hmun hma an fang kual nghal bawk.

Health Minister chuan Doctor leh Nurse-te inpekna leh hnathawh chu fakin, an thawhrimnnaah lawm thu a sawi a. Tunah hian State Referral Hospital, Falkawn (SRHF) chu tihchangtlun zel tum a ni a, a bul tan nan doctor leh nurse eng emaw zat chu dah belh tum mek a ni tiin medical college hawn thuai anih theih nan Medical Council of India (MCI) duhdan (norms) tipuitling tur a chak taka hmalak mek a ni a ti bawk.

College din a nih hnua changtlung taka a kal zui zel theih nan sum deh chhuah dan tur leh thawhpui tur (collaboration) zawn a tul tur thu meeting-ah hian tarlan a ni a. Tuna construction buaipui mektu KMV Project, Hyderabad pawh an hna thawh dana a theih anga Priority Basis-a thawk tura vil ni se an ti bawk.

Dr Jane R. Ralte, Deputy Medical Superintendent, SRHF leh Doctor-te chuan an hnathawh dan tlangpui leh specialist enkawlna an pek theih hrang hrangte Minister hi an lo hrilh bakah, a hnenah hian an harsatna tawhte an lo thlen bawk a ni.

Advisory Committee hi Chairman leh member pakua awmna niin, meeting-ah hian an kal tha hle a ni.