No.566/2021-2022 

Aizawl, 18^th  May, 2021 : Vawiin khan Health Minister Dr. R. Lalthangliana hovin SAD Conference Hall, MINECO-ah Aizawl khawpui huamchhunga bial nei Minister, MLA leh AMC Councillor ten Aizawl khawpui chhunga COVID-19 hluar zel chungchangah inrawnkhawmna an nei a, meetingah hian Aizawl City Local Council Association, Health Department, AMC leh Police hotute an tel.

Meeting kaihruaitu Health Minister Dr. R. Lalthangliana chuan tuna COVID-19 second wave rawn thawk mek Mizoramin kan tawrh dan sawilangin Mizoram hmun tinah a tai darh tawh a, positive hmuhchhuah thar zinga 70% vel hi Aizawl khawpui huamchhunga mi an nih avangin, hmun dang ami te kan ngaihthah tihna ni lovin, Aizawl khawpui bik hi kan vei a ngai hle a, Aizawl khawpui chhanhim (Save Aizawl City from COVID-19) hi nasa taka kan kalpui a tulin a hriat a, Aizawl khawpuia cheng ten an aiawh tura an thlanchhuah, anmahni bialtute hi in pawimawh em em a, online leh phone hmanga sawi remchang lo a awm thin avangin, hmaichhana kan sawiho hi a pawimawh takzet a ni, a ti.

Health Minister chuan COVID-19 hri kaite chu Mizoram State Health Care Scheme hnuaia an inziahluh chuan an inenkawlna senso cheng nuaih 2 thlengin an bill thei tih a sawi a, nik,um lamah hemi chungchangah hian sawrkarin thupek a tichhuak tawh tih sawiin, DCH, DCHC, CCC leh CCCC a inenkawlte pawhin an bill thei vek tih a sawi. 

Meeting-a Police Contact Tracing Team report danin kumin April atanga May ni 16 inkar khan Mizoram chhunga khua/veng 65 ah COVID-19 positive hmuhchhuah an ni a, hemi hun chhunga Aizawl khawpuia COVID-19 positive hmuhchhuah tam zualna vengte chu :

May ni 1 – 16 inkara chhungkaw khata a ruala positive pakhat aia tam hmuhchhuahna hi chhungkaw 342 an awm a a, heng chhungkaw 342 ah hian chhungkaw member 1938 awmin, an zinga 1014 hi positive an ni. Chhungkaw member zawng zawng positive awmna hi chhungkaw 44 an ni a, a zatve aia tam positive awmna chhungkaw 144 a awm.

April thla chhungin  positive 1655 hmuhchuah niin May ni 1-17 inkar hian positive 2937 hmuhchhuah an ni.

Police Contact Tracing Team hian Aizawl khawpui chhunga hri inkaidarh nasat chhan thenkhat tarlangin heng zingah hian State pawn atanga mistiri rawn kalin mi 140 a kaidarh a, Mimal ina nepnawi zuar pakhatin mi a kaidarh zat 192 chhinchhiah a awm bawk a, damlo pakhat kanna atanga inkaichhawng mi 40 an awm a, positive pakhat YMA Committee leh Pavalai inkhawm a tel atanga inkaichhawng 41 an awm bawk.

Police Contact Tracing Team report danin May ni  1 – 16 in kara Police Contact Tracing Team report danin hmuhchuah zingah kum 10 hnuailam mi 295, kum 11 – 20 mi 409, kum 21 – 30 mi 659, kum 31 – 40 mi 574, kum 41 - 50 mi 360, kum 51 – 60 mi 249, kum 61 – 70 mi 94, kum 71 – 80 mi 45 leh kum 80 chunglam mi 17 an awm a ni. Positive hmuhchhuah thar zingah vaccine dose hnihna la tawh mi 8 awmin, vaccine dose khatna la tawh mi 5 an awm.

Integrated Disease Surveillance Programme (IDSP) report danin Mizoram chu India hmarchhak State zinga sample test tit ha ber dawttu niin kum 2011 census atanga chhutin 31.49% test tawh a ni a, Arunachal Pradesh hian 36.21% an test tawh thung.May thla chhung ni 16 thlengin AMC area ah positive 1566 hmuhchhuah a ni a, April atanga May ni 17 thlenga positive hmuhchhuah 4592 zinga 72 % hian symptom an nei a ni. 

Meetingah hian Minister 2 Pu Lalruatkima leh Pu Robert Romawia Royte bakah MLA leg Councillor te hian an bial chhung COVID-19 dinhmun an report a, harsatna an hmachhawn chungchangte sawiin zau takin ngaihtuahna an sengho a ni.

Vawiina an sawiho zingah hian COVID-19 hri kaite enkawl dan leh buaipui dan rualkhai zawka kalpui a nih theihna tura inkahhruaina siamte, Mizoram State Health Care Scheme a mi tam zawk an in ziahluh theihnan hun hawn lehte, Bazar dan leh dawr hawn dan chungchangte bakah lockdown phelh a nih huna chetlak dan tur chungchangte, positive te an rilru leh ngaihtuahna fim leh hrisel taka an hman theihna tura ruahmanna siam chungchangte a tel a ni.