No.3841/2021-2022
Aizawl, 28th January, 2022 : Vawiin khan Health Minister Dr. R. Lalthangliana hovin District tina Deputy Commissioner te leh Chief Medical Officer (CMO) ten COVID-19 dinhmun sawihovin virtual meeting an nei a, Health & Family Welfare Board Vice-Chairman Dr ZR Thiamsanga pawhin he hun hi a hmanpui a ni.

Health Minister Dr R. Lalthangliana chuan nikum kum tawp lam khan kan dinhmun a ziaawm chho viau hman a, tunhnaiah hri kai kan pung nasa leh ta hle hi a lungchhiatthlak a, puh tur zawn duh chuan a awm teuh thei ang a, mahse chu lam chu kan ngaihtuah hman tawh lova, hri inkaichhawnna dan chah leh hri kaite enkawl dam thuai thuai hi kan ngaih pawimawh ber a tul a ni, a ti a. Aizawl khawpui leh district headquarters te a hma kha chuan hri kai tamna a ni thin a, tunah chuan thingtlang kilkhawr ber ber nia kan ngaihah te pawh a khaw nawtin hri kai kan pung ta phawk phawk ma, Lengpui Airport ah pawh khualzin rawn lut mi 600 bawr vel kumin chhung ringawt hian hri kai hmuhchhuah an ni a, CCC leh DCHC kan neihsa te a khat chakin CCC siam belh leh hial kan ngai leh tawh a ti a, mipuite zingah hri kai inenkawl dan hriatthiam awlsam zawka kan inzirtir uar a tul tih sawiin, Home Isolation hi symptom nei lem lote tan chuan a tha tawk hle a, uluk taka in chik reng erawh a pawimawh dawn a ni, a ti.

Minister chuan vawiin chhun thlenga hripui vanga nunna chan kan neih mi 593 zingah hian Mipa 376 awmin Hmeichhia 217 an awm tih sawiin, nikum lamah Aizawl khawpuia chengte hi a thi tam ber an ni a, hripuiin thingtlang lam a luhchilh hnu hian nunna chan thingtlang lamah pawh an pung nasa hle a ti a, hrileng kan pun leh tak hluai a, kumin kum thar tir atanga vawiin January ni 28, 2022 thleng hian nunna chan mi 42 kan nei tawh a, heng zinga mi 35 hi Aizawl khawpui pawn lam mi an ni,a ti a. Kum 60 chunglam nunna chante zingah vaccine la lo an tam chu a pawi takzet tih sawiin vaccine lak chungchangah tan lak a ngai tih a sawi bawk a ni.

District tin atangin DC leh CMO ten report an pe a, District tam zawkah COVID-19 No Tolerance Week hmangin executive duty leh Police bakah Task Force te ngawrh taka an duty thu tarlan a ni a, district hrang hrang dinhmun leh an hmalaknate ngaihthlak a ni bawk.

COVID-19 Vaccination programme pawh district tinah tluang taka kalpui a nih thu tarlan a nih rualin chhuanlam hrang hrang nei a vaccine la duh lo an la awm thu tarlan a ni a. Hemi chungchanga hmalak dan turte sawiho a ni.