No.3842/2021-2022
Aizawl, 28th January, 2022 : Lunglei Districta Covid-19 hri kai thar pung zel tur chhutchah a nih theihna tura hmalak zel dan tur ngaihtuah ho turin vawiin khan Convention Centre, Lungleiah meeting pawimawh neih a ni.

Meeting-ah hian Lunglei District huamchhunga VLTF Chairman zawng zawngte tel tura koh niin DLTF Chairman Pu Kulothungan A, Member Secretary Dr LC Liana, Lunglei SP Pu Rex Zarzoliana Vanchhawng leh sawrkar official dangte an tel a ni.

DLTF Chairman Pu Kulothungan A chuan tun dinhmunah Lunglei District-ah Covid-19 hrileng nasa taka a darh mek zel thu sawiin hrileng do kawngah theihtawp kanla chhuah tlan zel a tul a ni, a ti a. January thla chhungin Lunglei District-ah Covid-19 hri kai thar pung mek zelin January thla chhunga test 12,508 neih tawh atangin Covid-19 positive mi 1860 awm tawhin tun thla chhunga kan positivity rate hi 14.87% a ni a, a sang hle a ni, a ti. Hrileng darh zel tur chhutchah a nih theihna tura ngaihtuahna seng ho tura koh khawm an nih thu sawiin Lunglei District huamchhunga hmalakna chak zawka kalpui anih theihnan VLTF hruaitute chu an mamawhte leh an ngaimawh zawngte inthlahrung lova tlang taka sawilang turin a sawm a ni.

Vawiin meeting ah hian Restricted area puan chungchang, contact tracing chungchang, SOP, CAB, security duty chungchang leh Myanmar raltlan chungchang sawiho a ni.

District pum huap lockdown puan ngai dinhmuna kan awmloh nan leh hrileng hluarna hmunah chhutchah thuai thin anih theihnan a tul apiangah Restricted area puan zung zung theih ni se tiin VLTF Chairman te chu ngen an ni a. Tun dinhmunah Lunglei District-ah Restricted area pakua - Thenhlum, Sekhum, Zotlang, Bunghmun, Zotuitlang, Lungpuizawl, Haulawng, Serkawn, Bualte ah te neih mek niin hmun thenkhatah khua/veng pumpui anih laiin veng/khua thenkhatah chuan Covid-19 hrileng hluarna hmun bik chauh Restricted area a puan a ni. Heng restricted area neih mek te hi January thla chhunga a puan an ni.

H&FW Department, Lunglei District chhinchhiah danin vawiin January ni 28, 2022 thlengin Lunglei District-ah Covid-19 test 1,30,082 neih tawh niin 13,957 (10.73%) positive hmuhchhuah an ni a. Covid-19 avangin Lunglei District ah mi 33 (mipa - 25 leh hmeichhia - 8) ten nunna an chan tawh bawk a ni. Covid-19 vei enkawl discharge tawh mi 12,963 niin recovery rate hi 92.88% a ni.

Tun thla chhungin Lunglei District-a Covid-19 vei hmuhchhuah zat an pung chho mek zel a. January ni 1 atanga vawiin January ni 28 thleng khan Lunglei District-ah Covid-19 positive 1860 hmuhchhuah awm tawhin tun thla chhunga kan positivity rate hi 14.87% a ni a. Kar kalta (21st – 28th January) chhungin test 4128 (RAgT – 3624, RT-PCR – 451 & Truenat - 35) atangin Covid-19 positive mi 758 (RAgT – 644, RT-PCR – 112 & Truenat - 2) hmuchhuah awmin kar kaltla chhunga positivity rate hi 18.36% a ni. Tun dinhmunah active case 963 an awm mek a. DCHC, Civil Hospitalah mi 5 admit mek an ni bawk.

Meeting-ah hian Myanmar raltlan chungchang pawh sawiho niin Mizoram sawrkarin thuchhuah alo siam tawh angin khaw tinan Village Level Committee on Myanmar Refugees din tura hriattir an ni a. He Committee hian Nodal Officer, Pu K Lalrohlua, Additional DC Lunglei hnenah format siam lawk angin kar tin report an thehlut thin dawn a ni. January ni 26 thleng khan Lunglei District khua/veng 21 ah Myanmar raltlan mi 1149 awm mek anga chhut an ni. Heng raltlante atang hian Covid-19 hrileng a darh zel lohnan hmalakna kalpui niin vaccination drive pawh kalpui chhoh mek zel a ni.