No.1545/2021-2022

Aizawl, 24^th July, 2021 :  Vawiin khan Health Minister Dr. R. Lalthangliana hovin SAD Conference Hall, MINECO-ah AMC area  a sample test runpui (mass testing) neih mek chak zawka kalpui dan tur sawiho a ni a. He hunah hian Health Secretary Pu R. Lalramnghaka, Health department hotu pawimawhte bakah Indian Medical Association,  Non-Government Hospital Association of Mizoram leh Medical Operational Team on COVID-19 aiawhte an tel a ni. 

Health Minister Dr. R. Lalthangliana chuan kar kalta chhunga mass testing tluang taka kalpui a ni chu lawmawm a tih thu sawiin, lockdown chhunga chak taka ruahman anga hma lak a ni chu thawktute inpekna leh LLTF te, YMA te leh kohhran hruaitute bakah mipuite thlawpna avang chauha hlawhtling thei a ni, a ti a. Sample test kan tih tam avang hian positive hmuhchhuah a tam lo thei lova, positivity rate pawh a sang ngei tur a ni a, hemi avang hian thlaphan leh chiai tur a ni lova, kan duhdan leh beisei ang tak a ni a, hri kaite kan hmuhchhuah zung zung hian kan tan a tha zawk a ni a ti a, a bik takin LLTF leh kohhran hruaitute chu positive hmuhchhuahte enkawlna tur CCCC ruahman kawnga theihtawp an chhuah avanga lawmthu hrilhin a tul anga hma lak chhunzawm pui zel turin a sawm a ni. Sample test ngawrh lehzuala kalpuina turah Private damdawi in neituten sample collecting team 4 lai mai an thawh thei tur chu lawmawm a tih thu sawiin an thahnemngaihna leh inpekna fakawm a tih thu a sawi a, sample testing kit chungchangah kan dinhmun a tha tih sawiin thlaphanna tur a awm loh thu a sawi bawk a ni. 

Meetingah hian kar kalta chhunga mass testing kalpui dante thlirho a ni a, sample testna tur hmun ruahmantu (assessment team) ten uluk taka an ruahman angin bawhzui thin a ni chungin veng thenkhatah sample test tur rin aia a lo tam thin avangin veng a tuk lamah test chhunzawm a ngai thin a, hei vang hian veng thenkhat a tuk lama test tura ruahmante pawh tihkhawtlai a ngai thin tih sawi niin thawktute indaihlohna phuhru tura private damdawi inte an rawn pen chhuak chu an tangkaipui hle dawn tih an sawi a ni.

IDSP hian sample collecting/testing team 5 tunah hian an nei a, team 1 ah hian sample la tu (lab technician) 4 leh data entry operator 6 zel an awm a, hri kai punna veng a awm belh zel vanga an indaihlohna phuhru belhchhah leh turin volunteers lak belh dan turte sawiho a ni a. Lockdown zawh hnuah pawh ruahmanna felfai tak nen mass testing hi kalpui zel a tul dawn thu sawi a ni bawk.