No.1544/2021-2022

Ni 23.7.2021 (Zirtawp) khan School Education Minister Pu Lalchhandama Ralte hovin School Education Department hnuaia officer-ten online meeting neiin Samagra Shiksha Project Approval Board (PAB)-in Mizoram tana hnathawh tur a pawmsakte  an thlirho.

School Education Minister Pu Lalchhandama Ralte chuan PAB meeting han neih hian beisei dan nei mah ila, hripui leng avangin India ram sum leh pai dinhmun a lo hniam ve leh zel bawk si a, beisei san pawh a har thu a sawi a. PAB meeting zawh hlima beisei ai khan tuna PAB minute a lo chhuah hian a tha zawk ta mah niin a lang a. ''Hmuh kan beisei min thlauhthlaksak te, kan beisei ngam loh min tuai tharsak te a awm bawk a, central lamin minute-a an tihsual siamthat turte a awm bawk a. Hengte tihfel a nih hunah chuan hripui leng avanga kum chhiaa kan ngaih hi Samagra lama kan rawngbawlnaah chuan malsawmna tam tak kan hmuh theihna tur, Mizoram zirnain hmalam kan pan theihna tur chhinchhiahtlak tak tak a tam a, a lawmawm hle a ni'' a ti. School Education Secretary Dr Lalzirmawia Chhangte hova PAB hmachhawntute pawh an chet that leh hlawhtlinnaah a lawmpui thu a sawi bawk.

Online meeting neihah hian Samagra Shiksha SPD Pu Lalhmachhuana'n PAB-in Mizoram tana a pawm te, hmasawnna leh tan lak ngaihna te a sawifiah a. Tun tum hi National Education Policy (NEP) hman hnua samagra budget hmasa ber anih thu te, Sustainable Developmental goals-ah a sang pawl kan nih thu te, Performance Grading Index (PGI) lamah erawh chuan tan lakna tur kan neih thu te tarlan a ni a. Diksha portal hmangin High School zirtirtu 4282, Higher Seondary School zirtirtu 1798 te chu online-a training pek tum an ni a, August 1,2021-ah tan tum a ni tih te pawh tarlan a ni. 

Samagra Shiksha PAB in a pawm tharah hian a langsar zualah chuan Secondary School thar 4 hawn belh turte, Higher Secondary School thar Arts stream atan 4, Science leh Commerce inkawp atan school 2 hawn thar tur te a tel a.  Kum danga la hmuh ngai loh school compound-a Tribal Affairs hnuaia Girls Hostel building sak tawhte school 11-ah hostel enkawlna tur chu pawm a ni a. Vocational Education hawn belh nan school 6 chu pawm thar a ni bawk. Virtual lab online class elementary leh secondary tana neihpuina tur te,  ICT@school  hnuaia Smart classroom kalpuina turte pawm a ni a. Hnathawh kal lai mek chhunzawmna tur kumtina dawn thin te pawh pawm a ni a, Hindi teacher 314 lak belhna turte pawm a ni bawk.  Mizoram samagra hnathawhna atana Ministry-in a pawm hi cheng vbch 293 a ni.

Samagra Shiksha hnuaiah hian elementary, secondary leh higher Secondary te, Teachers Education DIET te, Hindi Teacher te, Vocational Education te, Inclusive Education te kalpui an ni.   May 6,2021 khan PAB meeting chu online-in neih a ni a, Ministry of Education Secretary Pi Anita Karwal a chair a, Mizoram atangin School Education Department Secretary Dr Lalzirmawia Chhangte hovin officer-ten Mizoram tana Annual Plan an siamte an present a ni. 

Zirtawp zana online meeting neihah hian School Education Minister bakah Pu L.Thangmawia  MLA leh Vice Chairman HRD, Dr Lalzirmawia Chhangte Secretary, Pu James Lalrinchhana Director,  Pi Laldawngliani Chawngthu Director SCERT, Pu Lalhmachhuana SPD leh officer dangte an tel a ni.

Attachment

  • Loading attachment...