DIRECTORATE OF INFORMATION & PUBLIC RELATIONS, Government of Mizoram, India

No.1543/2021-2022

Dated 25th July, 2021: Nimin (24.7.2021) tlai dar 5:30pm khan Union Minister of Home Affairs Pu Amit Shah hovin India hmarchhak state Chief Minister-te chu State Convention Centre, Shillong-ah north east state tinte kaihhnawih thu pawimawh hrang hrang sawihovin an thukhawm. Union Minister of DoNER Pu G. Kishan Reddy leh Minister of State, Prime Minister's Office Pu Jitendra Singh te an tel a ni.

Mizoram Chief Minister Pu Zoramthanga chuan he hunah hian thu sawiin, he meeting hian India hmarchhak state ten harsatna hrang hrang an tawhte sukiang turin rah tha tak a chhuah a beisei thu a sawi a. Assam nen a ramri chungchang sawiin Chief Minister chuan he buaina hi hun rei tak atanga awm tawh, Nagaland, Meghalaya, Arunachal Pradesh leh Mizoramin state nihna an chan tirh pawh a tihfel loh, vawiin thlenga harsatna lo awm zui ta a nih thu a sawi a. Hemi chungchangah hian Assam chu heng state dang pali hringtu a nih angin inhmuhthiamlohnate chinfelna ah rilru puitling tak pu tura a beisei thu a sawi.

Assam in constitutional boundary anga a chhal ram zau tak chu Mizo ten kum za chuang lo leh leilet atan an lo hman char char tawh thu a sawi a. Assam Chief Minister nen June ni 29, 2021 inbiakna a May ni 10, 2021 anga 'status quo maintain ni se' tia an lo sawi dun tawh chu a taka kalpui tlang ngei ni se, tiin Mizoram Chief Minister chuan ramri ah hian remna awm thuai se a duh thu leh, thenawm state pahnihte inrem taka an awm dun theih nan he meeting hi a pawimawh thu hi a sawi.

Border chungchang bakah hian Chief Minister hian tunhnaia thenawm ram Myanmar atanga raltlan lo lut chungchang sawi bawkin, an sahimna zawnga lo lut an ni chu sawrkar laipui chuan hai der mai lo turin a ngen a. Mizoramin a theihtawp chhuah in riahna leh chaw ei tur pe mahse, state sum neih in a tlin vek loh avangin sarkar laipui a inrawlh a pawimawh thu a sawi. Chief Minister hian Ministry of Home Affairs kaihhnawih thil pawimawh dangte a sawi bakah India sawrkar atanga fund hmuh kaihhnawih thil dangte a sawi a. Central Sponsored Scheme (CSS), Externally Aided Project (EAP), Special Central Assistance to States for Capital Expenditure, NEC leh DoNER hnuaia Budgetary Allocation hmuh danah state tê tana harsatna awm thin chu ennawn a ngaih thu a sawifiah. Eastern Agricultural Marketing Corporation Limited (NERAMAC) chuan Mizoramah office din thuai turin leh management board-ah hmarchhak state tin atanga aiawh awm thei se tiin a thlen bawk.

Chief Minister hian kumin January thlaa NEC Plenary Meeting vawi 69 neih tak atanga hmalakna tur awm hrang hrang te bawhzui theihna kawng hrang hrang Mizoramin a neih te a sawi a. State hmasawnna atan All India services Cadre hran state in a mamawh thu a sawi bawk a. Service-a awm ten an post-na hmunah neitu thinlung an neih a, ram hmasawnna atan theihtawp an chhuah theih nan Mizoram tan Cadre hranpa siam a tul thu a sawi tel bawk.

Meeting zawh hian Chief Minister chuan Pu Amit Shah hnenah Boundary Commission for Settlement, Delimitation and Demarcation of Boundary Between Mizoram and Assam din tura All Political Parties, All Non-Governmental Organizations leh Joint Action Committee, Mizoram ten Memorandum an sign, kum 2018-a Prime Minister hnena lo thehluh tawh chu a copy a pe a; Mizoram mamawh pawimawh hrang hrangte a sawipui bawk a ni.

CM Pu Zoramthanga chuan Assam CM Pu Himanta Biswa Sarma nen inbe bawkin, ramri chungchanga state pahnih buaina chu rang lama chinfel thuai a nih theih nan remchang hmasa veleh a Mizoram lo kal turin a sawm a, Assam Chief Minister pawhin a sawmna hi tihhlawhtlin ngei a tum thu in a chhang.

Chief Minister hi Chief Secretary Pu Lalnunmawia Chuaungo leh DGP Pu SBK Singh ten an tawiawm a ni.

Attachment