656/2023-2024

Aizawl, the 1st June 2023 : Mizorama Sikserh Malaria dinhmun, a invenna leh malaria case tih tlem nan Mizoram Sawrkar hotute sawipui tura Mizoram lo zin mek Central Team chuan vawiin khan MINECO Conference Hall ah Health & Family Welfare Minister Dr. R. Lalthangliana leh Department hotute nen hemi chungchang hi an thlirho a. Ministry official te hi tunhnaia Health Minister Delhi a zin tuma a sawmna ngaipawimawha sikserh chungchanga review meeting nei tura lokal an ni a. Central Team hi Ministry of Health  & Family Welfare a Joint Secretary Pu Rajiv Manjhi'n a ho a, an vaiin mi 6 an ni.

Health Minister Dr. R. Lalthangliana chuan sikserh dinhmun thlirhona chu Department in sikserh dona kawngah an hlawkpuiin hma thar an lakna kawngah rah tha a chhuah ngei a beisei thu sawiin kan dinhmun dik tak kan hre thei a, chak  zawkin engtin nge sikserh hi kan do tlan theih tiin ngaihtuahna seng hoin kan sawiho thei hi thil tha tak a ni a. Sikserh dona leh tihtlem kawngah Department chuan tun aiin tan a khawh leh dawn tiin a sawi bawk. Mizorama malaria case tamna District 4 te – Lawngtlai, Lunglei, Mamit leh Siaha te chu tlawhchhuah a tum thu leh heng District a malaria lama thawktute bakah District Council te pawh hemi chungchang a bik taka a sawipui tum thu a sawilang bawk. 

Dr. Eric Zomawia, Mission Director, National Health Mission chuan Mizorama malaria dinhmun chungchang te, hmalakna hrang hrang te leh malaria dona leh tihtlemna kawnga ruahmanna siam te meeting ah a tarlanga. Malaria dona kawnga mamawh an neihte pawh tarlangin phar natna (leprosy) leh mitdel blindness dinhmun leh hmalakna hrang hrang a tarlang tel bawk a ni.

Pu Rajiv Majhi, Joint Secretary, Ministry of Health & Family Welfare pawhin National Centre for Vector Borne Disease Control (NCVBDC) Team in Lunglei leh Mamit District an tlawh tuma an thil hmuh dan leh rawtna an siam te chu sawilangin kum 2015 atanga 2018 chhungin Mizoramah malaria case a tlahniam a, mahse kum 2019 atangin a rawn pung chho leh a, hei hi thil ngaihtuh ngai tak a ni a, a dona kawng hrang hrang hi kan ennawn a, enge tha ber ang tih kan ngaihtuah a ngai a ni, a ti. Mizoramin sikserh dona kawngah a mamawh te chu kan ngaihtuah zel dawn a ni, a ti bawk.

Kum 2022 khan Mizoram ah malaria case 10229 hmuhchhuah niin Ram pumah malaria case tamna chhutin Mizoram chuan dinhmun 7-na a luah. Hmarchhakah Mizoram chu malaria hmuhchhuah tamna ber state a ni. Kum 2022 khan malaria vangin mi 10 an boral a. Kumin January atangin April thleng khan malaria case 1734 hmuhchhuah tawh niin malaria vanga boral (confirm death) an la awm lo a ni. Lawngtlai, Lunglei, Mamit leh Siaha District te hi malaria tam zualna District te an ni. Kum 2022-23 khan phar natna mi 7 hmuh chhuah niin a kum hmasa a hmuh chhuah chu mi 1 a ni.

Nimin khan Health Minister Dr. R.Lalthangliana chuan Mizoram Governor Hari Babu Kambhampati chu a office-ah a kawm a, Health Department hmalakna hrang hrangte sawipuiin Sawrkarin infrastructure lama a hmalaknate la enpui turin a sawm a. Raj Bhavan ah hian Mizoram tlawha rawn zin mek Union Minister of State for Minority Affairs Pu John Barla a kawm nghal a, Mizoram mamawh hrang hrangte a thlen bawk.