Vawiin khan Synod Conference Hall-ah Health & Family Welfare Department buatsaihin Rashtriya Swasthya Bima Yojana (RSBY) leh Mizoram State Health Care Scheme Enrollment, 2018-2019 State Level Workshop neih a ni a. Health Minister, Pu Lal Thanzara chuan he hun hi a hmanpui a ni.

Health Minister Pu Lal Thanzara chuan Mizoramah Health Care Scheme hi kum 2008 atang khan kalpui a ni tiin RSBY hi kum 2010 atang khan kalpui a ni bawk a ni, a ti a. Scheme hrang hlak pahnih scheme pakhat anga kalpui a nih dan sawiin RSBY Smart card chu hman phawt a ni a, chumi zawhah health care scheme atan hman a ni leh a ni, a ti a. Kumin hian SCHIS (Senior Citizens Health Insurance Scheme) kalpui tum a ni a, hemi hnuaiah hian chhungkua a Senior Citizen (kum 60 chin) te chuan cheng 60,000 thleng an hmang thei a ni, a ti a. Minister chuan mi harsa zawkte tan phei chuan scheme tha tak a ni a, Mizoram bik phei chuan tum thum lai RSBY-ah thawh that lawmman kan dawng tawh a ni, a ti. Kum 2018-2019 hian Insurance Company Bajaj Allianz General Insurance Company Limited chu open competitive bidding hmangin RSBY kalpui tura thlan an nih thu sawiin heng scheme atana hming ziak lut pawh kum dang aia tha zawk an nih ngei a beisei thu a sawi bawk a. Health Minister chuan district hrang hrang a medical officer te leh health worker te pawimawhna tarlangin mahni bial theuhah theihtawp chhuah turin a fuih a. Scheme atana in ziak lut an tam chuan hriselna kawngah pawh nasa takin hma kan sawn phah thei a ni, a ti a. Workshop chu kalkhawm ten an hlawkpui ngei a beisei thu a sawi bawk a ni.

RSBY hi Sawrkar laipuia Ministry of Health & Family Welfare kalpui niin BPL, MNGREGA Job Card Holders, Industries Department hnuaia weavers register ho leh Street Vendors te tana Health Insurance Scheme a ni a. RSBY hmang thei chhungkua ten cheng 30 hming ziakna tur chawiin  thlalak leh kut zia (finger print) te la in Smart Card pek an ni a, he Card hmang hian kum khatah damdawiin admit senso cheng 30,000 thleng hman theih a ni a. Kumin 2018-2019 ah hian SCHIS (Senior Citizens Health Insurance Scheme) kalpui kawp tum a ni a, hemi hnuaiah hian chhungkua a Senior Citizen (kum 60 chin chunglam ) te chuan cheng 60,000 thleng an hmang thei dawn a ni. Scheme hi Sawrkar Laipui in a duan angin Insurance Company kal tlanga kenkawh a ni a, Insurance Company Bajaj Allianz General Insurance Company Ltd. kenkawh tur niin April Ni 1, 2018 atanga March Ni 31, 2019 thleng a ni dawn a. Damlo ten Smart Card kengin damdawi inah an kut zia finfiah a nih hnuin enkawl man chawi lovin enkawlna an dawng dawn a ni. Sawrkar damdawi inah chuan tangka fai hmang lovin (cashless) a kalpui vek tur a ni.

Vawiin programme hi H&FW Secretary Pu Lalrinliana Fanai, IAS chuan a kaihruai a. Bajaj Allianz General Insurance Company Ltd. atangin  RSBY scheme kalpui dan chungchang leh tangkaina te ngaihthlak a ni a. Health Minister Pu Lal Thanzara chuan RSBY chungchang short film tlangzarhna a nei nghal a. Smart Card Service Provider-Smart IT chungchang inhrilhhriatna leh scheme chungchang sawihona neih a ni a. RSBY CEO, Dr. Biakthansangi chuan thusawina hun a nei bawk a. H&FW Principal Director Dr. F. Lallianhlira chuan lawmthu sawina in Workshop hi a khar a ni. Workshop-ah hian Health & Family Welfare Department hotu te, district hrang hrang a Chief Medical Officer, Senior Medical Officer, Medical Officer te leh Health Worker te an tel kim hle a ni.