Mizo Short Film Competition 2018 buatsaih tur chungchang kheuhhawnna programme vawiin khan I & PR Auditorium ah neih a ni a. Film siamtu competition a tel tumte hnenah competition chungchanga hriattur hrang hrangte hrilhhriat a ni.

Mizo Film Competition hi Mizoram puma a tuimi a duh apiang tana buatsaih a ni a. Story Board siam zawhah shooting hi mahni remchan dan anga neih tur a ni a. Film hi Mizo nunphung tarlang thei, thawnthu chu mahni duh dana phuah mai tur a ni. Film hi 23 - 30 minutes a ni tur a ni a, April 20, 2018 aia tlai lovah Pi Lallianpuii, Joint Director, I & PR hnenah thehluh tur a ni.

I & PR hian Film Competition hi a lo buatsaih fo tawh thin a. Film siamtute kutchhuak pawh a changtlung sawt hle a. Tuntuma Short Film Competition hi National Level thleng phak ngei tura uluk taka buatsaih turin uluk taka kalpui a ni dawn a ni.