Vawiin khan State Supervisory Board on Prenatal Conception and Prenatal Diagnostic Technology (PC&PNDT) chu Health Minister Pu Lal Thanzara hovin Chief Minister's Conference Hall ah an thukhawm.

PC&PNDT Rules 1996 in a sawi angin Ultrasound awmna sawrkar leh private Hospital, Clinic leh Centre te reng rengin nu naupai an endikna report Form F chu dan ang thlapin thuneitute hnenah an endik atanga chhiara thla thar ni 5 ral hma ngeiin an thehlut thin tur a ni a, meeting-ah hian Mizoram chhunga centre tinah dan zawm tura inhriattirna lehkha sem chhuah an tum thu sawilan a ni a. Heng Ultrasound Centre te hi thla thum dan zelah State Inspection and Monitoring Committee’ (SIMC) ten tlawhin sawrkar laipuiin kaihhruaina a siam Standard Operation Guidelines an zawm em tih uluk takin an endik thin tur a ni.  Tun hnai khan SIMC te hian Kolasib leh Serchhip District an tlawh thu meeting-ah hian tarlan niin heng District-ah hian thil fello hmuh tur a awm loh thu SIMC aiawhte chuan an sawi.

Sawrkar laipuiin PC&PNDT Rules 1996 siam danglamin dan thar 'rule 19A' a dah belh a. He danin a sawi angin State sawrkar chuan State Appellate Authority din tura hma lak mek a nih thu meeting-ah hian ngaihthlak a ni a. He State Appellate Authority hi Principal Secretary, Health & Familly Welfare emaw State Appropiate Authority tlukpui emaw a ai sang zawkin emaw a kaihruai ang. Kumin June 19 khan sawrkar laipui chuan official gazette tichhuakin sawrkar damdawi in leh centre te chuan a thlawnin Ultrasound an register thei tawh dawn a. He gazette tihchhuah a nih hma khan Centre leh ultrasound khawl register na man bakah registration thi tihnun (renew)-nan fee engemawzat sawrkar damdawi in te hian an chawi thin a ni.

Mizoram chhungah Ultrasound khawl awmna Centre 48 a awm a. Aizawlah 27, Lungleiah 6, Lawngtlaiah 4, Champhaiah 4, Saihaah 3, Kolasibah 2 awmin Serchhip leh Mamitah pakhat ve ve a awm a ni. 

Meeting-ah hian Mizoram State Women Commission Chairman Pi Vanlalawmpuii Chawngthu bakah sawrkar mi pawimawhte leh tlawmngai pawl aiawhte an tel a ni.