Vawiin chawhma khan MISNOPP (Mizoram State Network of Positive People) leh MIHRET (Mizoram Hepatitis Response Team) tangkawp buatsaih “World Hepatitis Day 2017” chu I&PR Auditorium-ah hman a ni a. Health Minister Pu Lal Thanzara chu Khuallian niin MSACS Project Director, Dr Lalmalsawmi Sailo chu Khualzahawm a ni. Kumin atana thupui chu “Eliminate Hepatitis” tih a ni. 

Khuallian Pu Lal Thanzara chuan Hepatitis hi tihdam theih natna a ni tih kan hriat theuh a tul a ni, a ti a. He hun buatsaihtu ten Hepatitis veite tana hma an lak tawhna chu lawmawm a tih thu sawiin, Hepatits natna chu Mizote zingah pawh natna hriat lar pawl anih thu leh India ram chu he natna vei tamna ram 10 zingah a tel thu a sawi a. Hepatitis natna enkawl hi a hautak avangin Mizoram Health Care Scheme-a in register-te tan Civil Hospital Aizawl-ah Rogi Kalyan Samiti (RKS) Fund kaltlangin February Ni 6, 2017 atang khan a thlawnin damdawi pek tan tawh a ni, a ti a. Mizoram Health Care leh Rashtriya Swasthya Bima Yojana (RSBY) hnuaiah mi 331 ten Hepatitis C treatment a thlawnin an dawn tawh thu tarlangin India ram hmarchhakah chuan hetiang ti hmasa ber kan nih thu a sawi a. Minister chuan Hepatitis B chungchang sawiin Civil Hospital Aizawl-ah vaccine a tlawm zawk a lak theihna March Ni 16, 2017 atang khan ruahmanna siam niin mi 25 hnenah tlawm zawka pek a nih tawh thu a sawi a. He natna do nan hian mipuite pawhin mawhphurna kan nei a ni tiin mahni dinhmun hre tura in test te, vaccine lakte leh natna kai lo tura nun uluk leh fimkhur a tul a ni, a ti.  

Khualzahawm Dr Lalmalsawmi Sailo chuan he program tum ber chu India ram bakah khawvel huapa Hepatits natna chungchang hrilhriatna leh zirtirna a ni tiin  Mizoram chu mipui tam zawnga chhutin he natna vei tam zinga mi kan ni , a ti a. He natna hi kan nundan (lifestyle) nen a inzawm a ni tiin inveng tur chuan taksa vawng thianghlim a ngai a ni, a ti. 

MISNOPP (Mizoram State Network of Positive People) hi 2011 a din niin Hepatits screening hi Mylan CSR project hnuaiah kum 2015 atang khan kalpui a ni a. MIHRET (Mizoram Hepatitis Response Team) hi kum 2013 khan din niin hepatitis ven nan awareness-te pein screening test-te pawh an lo kalpui tawh thin a ni. 

He hunah hian MIHRET Chairman Pu Moses Zofaka Pachuau chuan thu a sawi a, Civil Hospital Medicine HOD, Dr. Zothantluanga chuan hepatitis chungchang presentation a nei a. Synod Hospital MO,Dr. R.L Sanghluna atangin hepatitis chungchanga Mizoram dinhmun ngaihthlak niin Mizoram Health Care Society CEO, Dr Biakthansangi chuan enkawl dan tur leh hmachhawpte a tarlang bawk a. MISNOPP President Pi Lalnunhlimi chuan lawmthu sawina in hun a khar a ni. World Hepatitis Day hmanna hunah hian MSACS, Social Welfare Department, Mizoram Health Care Society, MISNOPP, MIHRET leh Tlawmngai Pawl bakah  Home leh Rehabilitation Centre hrang hranga thawktute an tel a ni.