Mizoram Hindi Training College(MHTC), Durtlang North chuan kum 2017-18 session-a zirlai tharte pualin vawiin khan Freshers’ Social-ah an hmang a. He hun hi Deputy Director, School Education Pu Lalchungnunga leh MHTC Principal Dr.Louis Hauhnar ten an hmanpui. 

MHTC Auditorium-a Freshers’ Social neihah hian Pu Lalchungnunga chuan  Education Department-ah Hindi lam enkawltu a nih angin chu National Level Entrance Test a inziak tling, MHTC-a course hrang hrang zirtur Mizoram hmun tin atanga lokalte a lawm thu sawiin an zirchhuah hunah zirtirtu rintlak leh taima ni turin, mahni inrintawkna nen theihtawp chhuah turin a chah a. MHTC-ah kum 2017-18 atangin Hindi Correspondence Course Mahatma Gandhi International Hindi University, Wardha-in study centre a rawn hawnsak tur chu Mizoram-a Hindi Education atan hmasawnna ropui tak niin a lawmawm tak zet a ni tih a sawi. Kumin April-May, 2017 chhung khan CSS Hindi Teacher 1305 zinga mi 141 te chu sorkar laipuia CSS Evaluation Team, New Delhi ten interview an rawn neih thu leh interviewna pawh lungawi thlak an tih thu a sawi bawk. CSS Hindi Teacher mi 1305 te April 2017-a an hna chawlhtirte rawih zui dan ngaihtuah chungchangah Central sorkar leh Mizoram sorkar te hmalakna lawmawm a tih thu a sawi bawk. 

Freshers’ Social-ah MHTC Principal Dr.Louis Hauhnar chuan MHTC chu kum 1975 October-ah Govt of India leh Govt of Mizoram tangkawpa din a nih thu sawiin a din tirh atanga kum 2017 thlengin M/S leh H/S Hindi Teacher In-Service leh Pre-Service mi 2000 zet trained chhuah an nih tawh thu a sawi a. MHTC hi NCTE (National Council for Teachers Education) leh CIH (Central Institute of Hindi) Agra inkaihhruaina hnuaiah awmin, course leh syllabus zawm vek a nih thu leh MHTC-ah hian co-curricular activities (NSS, Red Ribbon Club etc) te phur taka kalpui a nih thin thu a sawi bawk. 

Thu a sawi zelnaah Dr.Louis Hauhnar chuan kum 2017-18 session atan hian kum danga an tih ngai loh angin Hindi Teacher Training turte chu CIH, Agra-in entrance test neih tirin, mi 180 zet tlingin LADC atanga deputation-a lokal nen zirlai 186 zet an awm thu a sawi. Kum 2016-17 session a zirlaite 100% an passed thu leh kum 2017-18 hian In-Service Hindi Teacher deputation-a training tur Mizoram sorkar-in a tirh loh thu a sawi bawk a. MHTC-ah hian regular class kal theilo tan Distance Education Study Centre hawng turin Mahatma Gandhi International Hindi University in hawn an phal sak thu leh MHTC Aizawl-ah B.Ed (Hindi) leh M.A Programme hrang hrang 2017-18 atangin hawn an phalsak thu Principal chuan a tarlang. (Mahatma Gandhi International Hindi University hi Central University niin kum 2007 khan President of India Dr. APJ Abdul Kalam an a hawng a ni.) 

MHTC ah hian zirlai 186, Ist Yr Hindi Shikshan Parangat/B.Ed-43, II Yr Hindi Shikshan Parangat-25, Ist Year ShikshanPraveen-21, IInd Yr Hindi Shikshan Praveen-33, Ist Yr Hindi Shikshak Diploma-28, II Yr Hindi Shikshak Diploma-36 an awm mek a. Vawiina Freshers’ Social 2017-2018 neih takah khan kal tharte atangin Mary Rinmuanpuii chu ‘Freshie Queen’ leh H. Rozampuia chu ‘Freshie King’ ah thlan an ni bawk.