Health Minister Pu Lal Thanzara’n vawiin chawhnu khan Health Workers’ Training School Kulikawn-ah 31st batch Health Worker Trainee -te Capping & Lamp Lighting Ceremony a hmanpui.

Khuallian Pu Lal Thanzara chuan Health Worker-te an pawimawh thu sawiin Sawrkarin hriselna beihpui a thlaknaah hian health worker-te chu hmahruaitu leh sulsutu ber an ni a. In tina lut a, Home Visit neia ram kilkhawr ber thleng a hmuna thutchilha hnathawktute an nih tlat avangin health worker-te hi hriselna lama mipuite zirtirna tha pek kawnga hma latu ber an ni, a ti. Health worker-te chu mipui nena inngheng renga awm an nih thu sawiin, mimal, chhungkua leh khawtlangah, a mamawhtute pan leh koh theih mai bakah, an area huam chhunga damlote, harsatna neite zawnchhuah hi an a thei china an tih tur pawimawh tak te zinga mi a ni a, khawtlang mipuite hnaih bera thawk an nih avangin khawtlang pumpui hi an duty na ward kan ti thei hial awm e, a ti.

Nurse lukhum in khum hian a entir chu mawhphurhna a ni tih sawiin, Health Minister chuan lukhum in khum hian midangte hriselna kawnga hma in lakpuina leh damlo in enkawlte chunga mawhphurhna pawimawh tak in lu chungah nghah a ni a. Lamp Lighting hian rilru leh taksa a natna tuar, mi mangang tak takte beiseina eng petu in nihzia a lantir mai bakah thliar bik neilo leh a hun leh hmun pawh sawi lova midangte tanpui hna thawk thin in nih avangin The Noblest Profession tih hial a ni tih, a sawi.

Zirlaite fuihna thuchah sawiin Pu Lal Thanzara chuan, an mawhphurhna sanzia hre reng chunga an zirlaiah tihtak zet a zira, hman tlaka zirchhuak turin leh thuawih taka awm turin a hrilh. Zirlai nu leh pa tawiawmtu te pawh an fate leh naute thatna tura an hotu te duan chhuah chu zawmpui hram hram thin turin a chah bawk a ni.

College of Nursing Principal Pi Lalchhanhimi’n Trainee-te chu lukhum khumtirin khawnvar a chhittir a thutiam an sawi rual nghal bawk a ni. He programme-ah hian Dr V. Lalhmingliani, Principal Medical Officer (PMO)-in inlawmna thu a sawi a, Pi Zothankimi Sailo, Principal Nursing Officer (PNO)-in report pein tun thlenga Health Worker Trained chhuak tawh mipa 429 leh hmeichhia 569 an ni tih a tarlang a ni.

Programme hi Pu Lalsangliana leh Pi Laldinsangi Ralte te’n an kaihruai a, Health Principal Director Pi K. Ropari leh Officer dang thahnem takin Minister hi an tawiawm a ni.