Planning & Programme Implementation Department-in Mizoram hmathlir chungchanga Essay inziahsiak a buatsaiha lawmman dawngtute hnenah Planning Minister Pu Lalsawta’n vawiin khan lawmman a hlan.

Hlanna inkhawm, Planning Department Conference Hall-a vawiina neihah hian thu sawiin Pu Lalsawta chuan, Essay Inziahsiak chu Chief Minister bul tan leh ngaihtuah chhuah a nih thu sawi a. A buaipuitu Planning Department-a thawkte leh essay ziaktu zawng zawng chungah lawm thu sawiin, essay-a rawtna leh ngaihdan tarlante chu sawrkarin rilru inhawng taka dawngsawngin, chumi hmang chuan ram hmasawn nan theihtawp a chhuah zel dawn a ni, a ti. Top 10-a tling lote pawh an thawhrimna a thlawn lo vang a, an ngaihdan lak chhuah tur a awm tho vang tiin, essay ziaktu zawng zawngte chu hun lo kal zel turah pawh an rawtna leh ngaihdan te Mizoram sawrkarah inthlahrung hauh lova thlen zel turin a ngen nghal bawk. Mizote hi hnam enkawl nuam tak kan nih thu leh ‘change’ chu pawimawh bera a hriat thu sawiin, Planning Minister chuan inthlakthlengna/hmasawnna tha a awm theih nan sawrkar chuan a tih theih apiang a ti dawn a ni, a ti a. 14th Finance Commission-a tih danphung inthlakin a tha zawnga nghawng a neih theih tur thu tarlangin, chumi lo chhawr tangkai tur chuan Skill Development concept tha tak neih a pawimawh tur thu a sawi bawk.

Planning Secretary Dr C.Vanlalramsanga chuan inkhawm kaihruaiin, Planning Department-in Essay Competition a buatsaih dan leh a buatsaih chhan te leh essay en dik a nih dan te a sawi fiah a. Sawrkar inrelbawlna, ei leh bara ram hmasawnna leh khawtlang inkaihhruai dan te chu a inzawm vek a; ram hmasawn nan hian mi tinin mawhphurhna leh tih tur an nei vek a ni tiin, hmasawnna atana rawtna awmte pawh chu sawrkar kuta dah mai lova mahni tih tur tawk lo hriat a pawimawh hle a ni, a ti.

Planning Department Deputy Adviser Pu Lalchhuanawma Hrahsel chuan kal khawmte hmuh atan Top Ten essay-a ngaihdan leh rawtna lang zinga pawimawh leh langsar zualte a tar lang a. Ruahmanna tha neih, thuneihna semzai, dan tha siam leh kenkawh, buh leh bala intodelh, tourism tihhmasawn leh sawrkar, kohhran leh NGO-te thawh hona tha neih tih te chu rawtna langsar zualte an ni.

Khuallianin lawmman a sem zawhin, Planning Department hotute, Essay Inziahsiaka Judge-te leh a ziaktute’n sawi hona hun an hmang nghal a. He hunah hian essay-a langte leh lang lem lo pawh, Mizoram hmasawnna tura thil pawimawh tak tak sawi ho a ni a. Planning Department Adviser Pu Saihlira chuan lawm thu sawiin he hun hi a khar a ni.

He Essay Inziahsiakah hian “Mizoram Hmathlir: Sawrkar inrelbawlna (Governance), Ram hmasawnna (Economic Development) leh Khawtlang thil (Social Issues)-ah” tih thupui hman a ni a. Mi sawmli pathum (43)-in essay an theh lut a. Chu’ng zinga a tha zual sawm leh pakhat (11) chu thlan chhuah leh niin, chu’ng atang chuan lawmman dawngtu turte thlan chhuah leh an ni.

He Essay Inziahsiak hi Planning Department-in heti ang lam hawi intihsiakna a buatsaih hmasak ber a ni a. Endiktu (Judge) pathum – Prof. Lianzela, Prof. Vanlalchhawna leh Dr. James LT Thanga te awmin, Facebook atangin vote lak a ni bawk. Lawmman dawngtute chu he’ngte hi an ni:

1. Lalzahawma, Kawlkulh : Rs 50,000/- leh citation

2. H.Laldinmawia, Chanmari, Aizawl : Rs 30,000/- leh citation

3. C.Lallianngura, Zuangtui, Aizawl : Rs 10,000/- leh citation

4. Dr. Lalthakima, ITI Veng, Aizawl : Rs 5,000/- leh citation

5. Vanlalmawia Renthlei, Ramhlun South, Aizawl : Rs 5,000/- leh citation

6. R.Lallawmkima, Champhai Vengsang : Citation

7. Lalrinkima, Aizawl Venglai : Citation

8. Lalmuanpuia Zawngte, Chanmari West, Aizawl : Citation

9. Dr Joseph K.Lalfakzuala, Kulikawn, Aizawl : Citation

10. Dr Lalhunthara, Republic Veng, Aizawl : Citation

11. V.Laltanzuala, S.Chawilung : Citation

He’ng essay tha zual sawm leh pakhat thlan chhuahte hi a bu-a siam niin, hemi hunah hian sem nghal a ni a. A duh apiang chhiar theih turin public domain, Facebook-ah “Mizoram Hmathlir” tihah dah a ni bawk.