1023/2023-2024

Aizawl, 4th July 2023: Health Minister Dr. R. Lalthangliana chuan vawiin khan Bukpui Primary Health Centre sak thar chu a hawng a. Tuirial Assembly Constituency Bialtu MLA, Commerce & Industrial Development Board Vice Chairman ni bawk Pu K. Laldawngliana chuan Health Minister hi a tawiawm a ni.

Hawnna inkhawm Bukpui PHC tualzawla neihah thu sawiin Dr.R.Lalthangliana chuan Health Minister a nih hnuah Mizoram hmun hrang hrangah PHC 20 chuang hawn a ni tawh, a ti a. Vawiina hawn tak Bukpui PHC bakah hian Suangpuilawn, Lungsen, Bualpui NG, Marpara leh Reiek-ah te PHC building thar sak zawh leh hawn thuai hmabak a awm thu a sawi a. District thar pathum - Saitual, Khawzawl leh Hnahthialah District Hospital nuai 1700 man theuh sak mek a nih thu te, Champhaiah Critical Care Block sak mek a nih thu te, ramchhung hmun hrang hranga Health Sub Centre te Health & Wellness Centre a hlankai an nih tawh thu te, Sub-Centre awm lohna khua te harsatna phuhru turin Health Clinic khaw 230 chuangah din a nih tawh thu leh Tuirial bial chhunga khaw pangaah din a nih tawh thu a sawi bawk.

Covid hripuiin Mizoram kum hnih chuang a nuai chhunga mipui, khawtlang, kohhran leh sawrkar department zawng zawng te tanrualna chu a ropui hle a ni, a ti a. Hripui len chhunga khawpui leh thingtlanga chengte inkarah hmangaihna, lainatna leh duhsakna lo lang chhuak kha a ropui hle a ni, a ti. Finance Department hotu ten Covid vangin Mizoram sawrkar chuan budget pawn lam atangin cheng nuai 20,000 chuang a hmang tih an hrilh thu Minister hian a sawi a. Covid-in kum hnih leh thla thum zet khawvel a nuai avang te, khawchhak lirnghing, vawk hri (ASF) leng avang te, ram thenawma buaina leh ramri buai avangte in tun sawrkarin hnathawhna hun a nei tlem hle a, mipui beisei phak lohna tam tak a awm thu leh hnaruak tam tak hnawhkhah theih a ni lo chu Minister chuan pawi a tih thu a sawi a. Mizoram mipuite hnenah thinlung taka an mi hriatthiamna a ngen nghal a ni.

Bukpui PHC tuala hawnna inkhawm tawi neih zawhah hian Khawkunga Hall-a zirlai kalkhawmte hmaah Dr. R. Lalthangliana hian thu sawina hun a hmang leh a. He hunah hian Bukpui khawtlangin damdawiin tha tak an nei chu a lawmpui thu a sawi. Khawvel hmun dangte banphak ve tur chuan damdawiin tha neih chauh a tawk lo a ni tiin zirna ah hmasawn ngai a, zirlaite chu zirna lama tan la zel turin a fuih a ni. Mizoram chu ziak leh chhiar thiam tamna ram a ni chungin thiamna bik neih ngai kawng hrang hrangah hnufualna a la tam thu a sawi a. Zoram Medical College-a thawk tur ram leilung fa an tlem chu rualawh a nat thin thu sawiin JICA hnuaia Zemabawka sak tur Cancer Superspeciality Hospital-ah pawh ram leilung fa ngei an thawh theih nan tun atanga tan la turin Mizo nula leh tlangval te a sawm a. Zirlaite chu taksa tichhe thei ruihtheihthil a fihlim tur leh hriselna pawimawh zia hre reng turin a chah nghal a ni.

Bialtu MLA Pu K. Laldawngliana pawhin a bial chhunga PHC tha tak hawn a ni ta chu lawmawm a tih thu a sawi a. PHC Building sak thar a nih theih nan a hmalak puitu Chief Minister, Health Minister, Health Department a thawk leh khawtlang hruaitute chungah lawmthu a sawi a ni. Damdawiin chu neitu rilru pu chunga uluk taka enkawl tura chahin, damna hmun pawimawh a nih ngei theih nan duhsakna a hlan bawk.

PWD Project Sub Division Kolasib, SDO Pu Joseph Laldintluanga chuan technical report a pe a. Bukpui PHC hi chhawng khat a sang niin, square meter 578 a zau a ni a, NABARD RIDF-26 hnuaia hmuh cheng 2,67,00,400 senga sak a ni. PHC ah hian Casualty Room, X- Ray Room, Male leh Female Ward bakah room hrang hrang Kitchen, Nurses Changing & Rest Room, Casualty, Opthalmic, Registration Dispensary, Main Centre, Allopathy Room, Ayush Room, MO Office, Laboratory, Preparation Room, Delivery Room, Minor OT Room, General Store Room leh Training Hall te a awm a. January ni 6,2022 ah hnathawh tan niin, July 6,2023 a sak zawh tura ruahman a ni a, ruahman aia hmain sak zawh a ni ta a ni.

Vawiin inkhawm hi Health Services Director Dr. Vanlalsawma chuan a kaihruai a, Kolasib District Chief Medical Officer Dr. Lalawmpuia Chhangte chuan lawmthu sawiin hun a khar a ni.