1024/2023-2024

Aizawl 4th July 2023: Vawiin khan Government KVM High School, Chhinga veng chuan kum 50 (Golden Jubilee) an tlin lawmna chu an school tualah an nei a, he hunah hian School Education Minister Pu Lalchhandama Ralte chu khuallian niin a hmanpui a. Bialtu MLA Pu Robert Romawia Royte chu khualzahawm niin Pu Lalrinsanga Ralte, Serlui bialtu MLA chu khualtha a ni.

Khuallian chuan Golden Jubilee Lungphum hawnna a nei hmasa a, chumi hnua a thusawina ah Mizoram tana zirna in pawimawh leh tangkai tak KVM High School din a nih theihna tura Pu H. Keuvunga te nupa inpekna fakawm a tih thu a tarlang a. KVM High School-in Mizoram mi chhuanvawr leh hmingtha tam tak a lo chherchhuah tawhna chu ropui tiin sawrkar sikul tihmingthatu zirna in pawimawh tak pakhat a ni a ti. Zirlai naupangte chu rual u zawkte hnungzui a hlawhtlinna sang tak chang tura inbuatsaih turin a chah a. Pu Lalchhandama Ralte chuan zirna leh thiamna avangin Mizoramin tun dinhmun hi a thleng a ni a ti a, dinhmun sang zawk a thlen zel theihna turin sawrkarin theihtawp a chhuah a, zirna in hmasawnna leh changkanna tluantling a thlen tih hria a thahnem ngai taka zirna hmasawnna kawnga thawk leh tan la turin Zoram mipuite a sawm a ni.

School Education Minister chuan sikul zahawmna tlahniam tawh tak chuan tunhnai ah ziaawm lam a pan a ni tiin Sawrkar bakah NGO, Local Council leh Village Council ten theihtawp an chhuahna zarah zirna In zahawmna pawh vawnnung thar mek a ni, a ti. Zirna in Mizo mipui zingah hmun lailum a luah leh tawh tih tarlangin Minister chuan thawhhonna tha vang chauh a ni, a ti. Mizoram hmalam hun chu zirna ah thui tak a innghat tih tarlangin Pu Lalchhandama Ralte chuan harsatna tamtak karah sawrkarin theihtawp a chhuah zel tih a sawi a, National Education Policy 2020 chak zawka kalpui anih bakah ‘Quality Education’ pawh kalpui mek a ni a ti bawk.

Zirtirtute chu zirlaite nu leh pa annihna theihnghilh lo turin a chah a, zirtirtu hna chu hlawh lak nan chauh a hmang lo tur leh hmangaihna nen zirlai naupangte enkawl turin a ngen a ni. Zirlai naupangte pawh tunlai khawvelah inelna a sang tawh tih hria a, tumruhna leh teirei peihna nen an zirlaite zir turin a fuih a. Hmalam hunah hlawhtlinna sang zawk an neih theuh na turin duhsakna a hlan nghal a ni. School Education Minister chuan KVM High School chu sawrkarin Hostel a siamsak dawn tih sawiin Hostel enkawltu tur thawktu mi 7 pek an ni dawn a ti bawk.

Khualzahawm Pu Robert Romawia Royte pawhin thu sawiin KVM High School ten kum 50-na hmel an hmuthei chu thinlung takin a lawmpui tih a sawi a. Zirtirtu leh zirlaite chu Golden Jubilee kumah result tha tak nei thei tura tanla tura fuihin, bialtu MLA a nihna angin Mathematics zirtirtu chu MLA Fund- atang a laksak dawn tih a sawi bawk.

Pu R. Lalrinawma, Sr. Teacher-in report a pek danin Pu H. Keuvunga te nupa in School din a nih theih nan cheng 10,000 an pe a, an fapa hming chawi hian Kapthangvunga Memorial School (KVM) chu ni 30, March, 1973-khan din a lo ni ta a ni. Kum 2006-2007 khan MP Fund atangin building thar sak niin, kum 2012 khan RMSA atang a sum hmuhin building hi sakbelh leh niin kum 2013 khan NECS ten building dang an sak belh leh bawk. Kum 1991 khan ‘Provincialised’ niin kum 1992 khan HSLC Examination Centre-ah dah a ni bawk. KVM High School atang hian Doctor, Engineer, Pastor leh Ramhruaitu mi tam tak lo chhuak tawhin tun dinhmunah hian zirtirtu-11 leh zirlai -73 an awm mek ani.

Vawiin Government KVM High School kum-50 tlin lawmna inkhawm hi Pi Lalrampari Hnamte, Headmistres chuan kaihruaiin Pi C. Lalngurpuii Sr.Teacher chuan lawmthu sawina neiin hun a khar a ni.

Government KVM High School hian an kum 50 tlin lawmna pualin Manipur atang a Mizoram a raltlante tanpui nan cheng 20,000 School Education Minister hnenah hian an hlan nghal a ni.