Tukin zing khan Health Minister Pu Lalrinliana Sailo chuan Zemabawk a Cancer Hospital a tlawh. Health Minister hi Pu Lalsawta, Principal Secretary, Health leh Director Hospital & Medical Education leh Department Officer te'n an tawiawm bawk. Zemabawk a Cancer Hospital hi khum 20, Mipa tan khum 10 leh Hmeichhe tan khum 10 ve ve awm theihna tur atana tih phawt a ni a, tun atanga rei lote ah luah theih beisei ani. He tih lai hian Mizoram ah Cancer natna vei kan tam hle a, he mi avang hian Damdawiin lian zawk, khum 200 awm theihna tur Cancer Hospital din anih theihna tur in hmalakna kalpui mek a ni bawk. Tunah hian Cobalt therapy Unit, Zemawbawk ah hian nitin inhem tur mi 30 an awm reng a, waiting list ah mi 50 vel awm ziah anga chhut ani bawk,  Cancer hemtu ber Radiotherapy Technician hi pakhat chauh a awm a awm avangin duh angin hna a chak thei lova, heng hi hria in sawrkar chuan a theih ang angin a thuam phui chho zel dawn a, India ram hmun dang atanga pan tlak khawp a tih hmasawn tum in sawrkarin hma a la mek.