1514/2026-2027

Dated Aizawl, the 24th July, 2026: Vawiin chawhma dar 11-khan Electric Veng YMA branch, Aizawl-in an member Tv. C. Lalremruata’n thisen vawi 100-a pekna puala branch pum huap thisen pek runpui Electric Veng, YMA Hall-a an buatsaih chu Health Minister Pi Lalrinpuii chuan khuallian niin a hmanpui.

Thu sawiin Pi Lalrinpuii chuan, tunlai khawvel changkang tawh takah pawh thisen hi mithiamte’n an la siam chhuah theih loh avangin a hlu êm êm a, vawi 100 thisen pe thei Tv. C. Lalremruata chu thinlung taka a lawmpui thu leh a inpekna hlenchhuak theia damna leh hriselna a nei chu vanneihna bakah mahni invawnna nia a hriat thu a sawi.

Tlawmngaia thisen petute an pawimawhzia khuallian chuan sawiin, thawktu thiam tak tak neiin khawl ṭha leh changkang tak tak nei pawh ni ila tlawmngaia thisen petu an awm si loh chuan chhawr ṭangkai lohin an awm dawn tihna a ni, a ti. Mi dang tana thisen pek hi a pawimawh em avangin kum tin World Blood Doner Day June 14-ah hman ṭhin a nih thu sawiin, Health Minister chuan kan mihringpuite nun chhan nân leh an nun pawhsei sak nân thisen pêk hi a ngai ṭhin a, tun aia kan uar deuh deuh a ngai a ni, a ti. 

Pi Lalrinpuii chuan a thlawna thisen pêk (voluntary) ah Mizoram chu India ramah a tiṭha bêr pawl kan nih thu sawiin, kan pi leh pute aṭanga tlawmngai hnam kan nihna chhawm nunna kawng pawimawh tak chu mi dang tana thisen pek hi a ni a, thisen mamawh damlo an pung tual tual a, kan ram leh hnamin ṭhalaite min mamawhna langsar tak pakhat chu thisen thianghlim mi dangte tana kan pek hi a nih thu a sawi bawk.

Khuallian chuan mimal, ṭhianho leh pawl anga thisen pek uar chhunzawm zel a ṭul thu sawiin, pianchampha emaw pass lawmna pual emaw ni pawimawh kan nuna thleng hrang hrang hmangin mi dangte tan thisen pêk hmangin luanchhuah i uar deuh deuh ang u, tiin mipuite a sawm a. Pi Lalrinpuii hian Tv. C. Lalremruata’n thisen vawi 100 a pek lawmpui nân leh zahna chibai buk nân thuziak leh pawisa fai a hlan bawk.

Tv. C. Lalremruata chuan ‘Kum ka tlin hmain damlo chhungten thisen pe turin min ngen a, ka la pe thei si lo va; hreawm ka ti em em a. Kum ka tlin hunah a mamawhtute tan thisen a tam thei ang ber ka pe ang tiin rilru kan siam a, tun dinhmun thleng tur hian ka intiamna chuan min nawrkal niin ka hria,’ a ti. Mizo ṭhalaite chu hriselna ngai pawimawh a, mahni invawng thianghlim tur leh mi dangte tan a tam thei ang ber thisen pe turin a sawm nghal bawk.

Programme hi Pu C. Lalrokhuma, Vice President, Electric Veng YMA-in a kaihruai a, Tv. C. Lalremruata’n thisen vawi 100-a pek pual hian branch pum huapa thisen pek runpui buatsaih an nih thu sawiin thisen pe thei tur hming pe lawk 180 vel an awm thu a sawi.

Electric veng chhunga tlawmngai pawl hrang hrang, ṭhianho leh mimal hmingin lawmpuina thilpek an hlan a, Pu C. Lalnunfela, President Electric Veng YMA in thu a sawi a. Pu Lalnunhlua, Assistant Secretary Electric Veng YMA in lawmthu sawiin hun hnung a khar a ni.