1513/2026-2027

Aizawl, 24th July, 2026 : Vawiin khan Pachhunga University College a Seminar Hall -ah " Seminar on Archives and Social Memory in Mizoram: Challenges and Prospects " tih thupui hmangin seminar neih a ni a, Art & Culture Department Minister Pu C Lalsawivunga chuan khuallian niin a hmanpui. Seminar hi Mizoram State Archives, Art & Culture Department, Mizoram leh History Department, Pachhunga University College- te tangkawpa buatsaih a ni.

Khuallian chuan thusawiin PUC- ah PU zira a kal thin thute leh PUC-a a kal laiin Library a kan avanga pawi a tih thute a sawi a; vawiinah erawh chuan Mizoram State Archives leh History Department, PUC tangkawpin Archives pawimawhna an zirho thei chu lawmawm a tih thu a sawi. Khuallian chuan Archives pawimawhna sawiin Archives chuan hunbi a neih loh thu leh, Archives chu thilhlui dahkhawmna mai ni lovin, hun kaltawh leh tun hun zawmtu pawimawh tak a ni, a ti. Zirmite puitu leh thuziak danglam tak pe chhuaktu a ni, a ti bawk. Ram changkang tan chauh ni lovin, Mizoram tan pawh a pawimawh a, kan hnam ral loh nan records leh document te vawn that a tul a ni, a ti.

Khuallian chuan Mizoram State Archives hian harsatna tawk mahse hma a sawn zel avangin lawmawm a tih thu a sawi a. The Mizoram Public Records (Amendment) Act 2024 chu Mizoram state a thil hlui dahthatna atan a tangkai hle thu a sawi a, chutihrual chuan Act thar a nih avangin Rules siam that mek a ni, a ti. Minister chuan khawvel changkang zelah digitalization a pawimawh chho zel a, sawrkar hmasaten digitalization bul an tan avangin an fakawm hle a, tun sawrkarah pawh hmalak chhunzawm zel a nih thu a sawi bawk. Za a za digitalization kalpui an tum thu a sawi bawk a ni.

Khuallian chuan zirlaite leh Mizoram State Archives te thawhhona tha an neih a pawimawh zia leh thawhhona an nei thei chu lawmawm a tih thu a sawi bawk; Minister chuan All India Service-ah Mizote kum 10 chuang zet an lang ta lo chu pawi a tih thu sawiin, vawiin a zirlai lo kal khawmte tan la sauh sauh turin a chah bawk a ni.

Art & Culture Department Joint Director Pu F Lalthanmawia chuan kalkhawmte lawmna thu sawiin, he programme hi Art & Culture Department tan pawh mellung pawimawh tak a ni, a ti. Pu F Lalthanmawia chuan Archives pawimawhna te, Mizoram State Archives in harsatna an tawh mek te leh hmasawn an ngaihna te sawiin, vawiin a an thilzirte hi zir liam mai lovin, ngaihtuah chiang a, Mizoramah Archives tihmasawn zel tura a pawimawhna hria a theihtawp chhuah turin kalkhawmte a fuih a ni.

Pachhunga University College Principal Prof. H Lalthanzara pawhin thu sawiin, Archives pawimawhna te a sawi a, Archives chuan tute nge kan nih, khawi atanga lo kal nge kan nih tihte, engtin nge kan ram a dinchhuah tih te leh kan ram hmathlirte pawh min hriattir a ni, a ti.

Vawiina kan Archives-te kan vawnthat loh chuan kan hnam rohlu kan dahthat te kan hloh thei a, kan identity thlengin kan hloh thei a ni tiin, seminar hian rah duhawm tak a chhuah a duh thu a sawi bawk a ni.

Seminar-ah hian NEZCC Board of Governors member, Pu Alfred Zothansanga Sailo chuan Resource Person niin he hun hi a hmanpui a; thiamna hrang hrang nei ten thupui pawimawh tak tak hmangin presentation an nei a; Mizoram State Archives Chemist- II, Pu C Lalmuanpuia chuan "Where Memory Meets Science" tih thupui hmangin thu a sawi a, Mizoram State Archives a Intern nilai leh PUC-a History Dept. Zirlai ni bawk, Rachel Lalremruati'n " Seeing History for the First Time: Reflections of an Archives Intern" tih thupui hmangin thu a sawi bawk a, PUC History Dept., Associate Professor, Dr. Rohmingmawii'n "Navigating Archives: A Personal Research Journey" tih thupui a sawi bakah, Sinlung Hills Council Deputy Secretary Pu James Miahlung hnen atangin thusawi ngaihthlak a ni bawk.

He hun hi PUC History dept. HOD, Dr. Esther Laltlankimi chuan a kaihruai a, Presentation neih zawhah hian sawihona leh zawhna leh chhanna hun hman chhunzawm nghal a ni. Mizoram State Archives, Art & Culture Department official te, Pachhunga University College History Department zirtirtu te leh zirlai ṭhahnem tak an tel a ni.