Vawiin chawhnu khan Nursing School Lunglei chuan an Auditorium-ah Graduation Day vawi 19-na an hmang a, Health & Family Welfare Minister Pu Lal Thanzara chu Khuallian niin, Mizoram Nursing Council-in exam a buatsaiha topper-te hnenah chawimawina thilpek a hlan nghal a ni.

Khuallian Pu Lal Thanzara chuan nurse graduate-te chu damlo an enkawlnaah ringtu nurse ni awm renga enkawlna tha pe a, midangte tana malsawmna ni turin a chah a. Hna an thawh hun pawha an hnathawh ti thuanawp thei thildang laka inthiar fihlm turin chah a ni. Damdawi lamah in enkawlna thar tha zawk leh natna thar tam tak hmuh chhuah reng a nih avangin nurse graduate-te chu inchhiar peih a, in zir zel turin a fuih a, ruihtheih thil bakah zuk leh hmuam laka fihlim hmasa leh fihlim tura ngaih an ni tih hre reng turin a chah bawk a ni.

Doctor indaih lohna avanga harsatna thleng mek chungchang sawiin, a vanduaithlakin pawi a tih thu a sawi a. National Health Mission hnuaiah doctor tam tak lak tur an awm laiin, doctor-ten mahni in lum atanga hna an thawh duh zawk avangin kan hmu zo thin lo a ni, a ti a. Sum harsatna avangin a nghet turin duh ang tawk kan la theilo bawk a, chungte chuan harsatna min thlenin, khawi district-ah mah an mamawh leh phu ang sawrkarin doctor kan post theilo a ni, a ti. Doctor lak belh turin sawrkar chuan theihtawpa hma a lak thu a tarlang bawk a ni.

Principal Pi T. Rozami chuan Nursing School Lunglei chungchang report pein, December 1995-a din a nih thu a sawi a. Mizoram sawrkar hnuaiah General Nursing & Midwifery (GNM) zirna awmchhun niin batch 19 an chhuak tawh a, graduate tharte tiamin mi 341-in an zirchhuak tawh a ni. Mizoram Nursing Council Exam hnuhnung ber, March 2017, Internship Result-ah Top 10-ah mi 5 rawn langin, topper nihna an hauh a ni. Christian Hospital Serkawn Principal Pi Vanlalthlengliani chuan nurse graduate-te hnenah fuihna thuchah sawiin, graduation certificate a hlan nghal a ni.

Vawiina Graduation Day vawi 19-naah hian zirlai 17-ten General Nursing & Midwifery course an pass chhuak a ni.